Diretór Ezekutivu Luta Hamutuk (LH), Jose Alves da Costa hateten, relasiona ho timoroan barak terus iha Portugal, ne'e la'os Governu mak sala, ne'e la'os iha Timor-Leste, porezemplu dezloka husi Dili hakarak ba Baukau, ne'e nasaun ho nasaun tanba ne'e labele fo kulpa ba Governu.
"Ha'u labele fó todan ba Governu relasiona ho ita-nia maluk sira ne'ebe terus iha Portugal, tanba ba mós la husu Governu para tau-matan, ida-idak buka osan no ida-idak hola billete tenke ba, depois hasoru difikuldade mak hakilar ba Governu", dehan nia, iha knaar fatin, Farol, horisehik.
Tanba ne'e, antes ba buka osan iha rai-li’ur tenke komunika ho Governu ho sertu, dadaun ne'e timoroan barak iha Portugal preokupa ho moris, depois Prezidente Republika, Jose Ramos Horta no mos Prezidente Portugal mos ba haree, fatin ba sira grave tebes, entaun ba buka moris iha estranjeiru tenke liuhosi Governu la'os uza privadu de'it.
"Tanba iha ema nia rai, relasiona ho ida ne'e, ita husu nafatin ba Governu halo intervensaun lalais oinsá asegura ita-nia sidadaun sira ne'e, karik laiha servisu tenke lori fila mai Timor", katak nia.
Jose dehan, ne'e hanesan referensia ida, nune'e joven sira labele ba nabnaban karik informasaun la klaru. Karik esforsu Governu nian mak deporta 100 mai Timor mak 100 ba fali ne'e mosu problema boot.
Tanba ne'e, nia parte mos husu ba Governu liuhosi Ministeriu Negosiante Estranjeiru no Kooperasaun (MNEC) presiza halo komunikasaun di'ak ho embaixador Timor-Leste iha Portugal tau matan nafatin ba Timoroan ne'ebe terus dadaun iha ne'eba.
Nia haktuir, tenke buka solusaun, kria kondisaun karik labele halo negosiasaun ho Governu Portugal hodi deporta, tanba ne'e labele fo espasu ba joven sira labele nababan atu ba buka moris iha rai-liur.
"Bainhira iha informasaun ne'ebe loos hafoin haruka sira ba servisu, sei ida ne'e garantia mak sira ba servisu, la'os ba helik aan iha Portugal ikus hetan susar atu fo sala ba se?", dehan nia.
Antes ne'e, Prezidente Republika, Jose Ramos Horta hateten, relasiona ho timoroan iha Portugál kontinua toba iha estrada ninin ne'e tanba la rona avizu ruma molok sai ba li'ur.
"Agora ita sai arbiru la rona avizu husi governu, no ha'u haree Autoridade polísia sira to'o agora la rona buat ida, grupu krime organizadu ne'ebé bosok joven sira la halo buat ida. Entaun ema kontinua sai, kontinua bosok sira, sira ba toba iha li'ur tanba osan laiha atu ba Hotel. Agora ita sai depois ba toba iha Jardím Governu Portugés mak sala ka Governu Timor mak sala," dehan PR Horta.
Nia dehan, ema ne'ebé husi Áfrika, Xina, ba Portugál, sira la buka toba iha Jardím, sira iha billete marka Hotel. Mais Timor ida-idak sai husi Timor konforme sira niaa hakarak.
"Governu, no ha'u rasik aviza dala barak ona, atu ba li'ur buka servisu hetan kontratu ba li'ur, bainhira idade 17 ba leten ita maioridade. Ha'u sei konvoka fila fali konsellu Superiór defeza seguransa atu rona informasaun husi orgaun sira ne'e haree ba krime organizadu ne'ebé bosok ema tun sa'e ba joven sira, joven sira sai vitima,"dehan Xefe Estadu José Ramos Horta.
Tuir Xefe Estadu, PSIK preokupadu liu mak ho joven sira no nia parte ejije, no mós husu tiha ona relatóriu fulan hira ona nem rona kazu ida ne'ebé liu husi Prokuradór Jerál Repúblika (PJR) ba Tribunál, maibé informasaun barak loos, no se mak rona tenke kuidadu. Joven balun kontinua halai ba Malázia tanba ema bosok, no ema foun daudaun Embaixadór iha Malazia hatete, joven balun ema bosok sira ba Indonézia lori ba Malázia, depois mak joven sira ne'e halai ba Embaixada husu ajuda ne'e krime organizadu.
