Diretór Ezekutivu Luta Hamutuk, José Alves da Costa hatete, dekretu lei kona-ba subsidiu $200 hatuur ona proibisaun ba uma-kain ne’ebé nia membru simu salariu liu $500 atu simu subsidiu.
Maibé, nia dehan, iha uma-kain balun ne’ebé sira-nia membru familia simu salariu liu $500 kontinua simu subsidiu $200.
Ida ne’e, tuir nia, akontese mós tanba Xefe Suku balun deklara ona katak sei fahe hotu subsidiu $200 ba uma-kain hotu-hotu iha sira-nia suku.
“Tuir loloos fó ba Xefe Suku, Xefe Aldeia ho Xefe Juventude mak tau-matan ba uma-kain ida ne'ebé vulneravel no kbiik laek, tanba sira mak koñese no tau-matan ba sira-nia populasaun iha suku no aldeia,” dehan nia iha nia knar-fatin, Sesta (16/12).
Tan ne’e, nia hatutan, karik iha Diretór Nasionál balun ho salariu $700 mak simu subsidiu $200, nia tenke responsabiliza ninia aktu.
LH husu ba KAK no PDHJ atu karik rona ona informasaun ne'e bele ba halo investigasaun hodi lori fila osan.
Iha fatin ketak, Xefe Suku Bidau Santana, João Paulo de Andrade informa, pagamentu subsidiu $200 lao di’ak, maibé iha membru PNTL balun haruka nia oan ba sede suku atu simu osan.
“Iha prosesu pagamentu ita konsege haruka fila na’in neen, husi PNTL balun nia osan mak lori fixa familia mai ida ne’e, ita la autoriza sira simu osan $200, tanba Komandu PNTL rasik mós la autoriza,” dehan João.
Aleinde ne’e, nia dehan, iha funsionariu husi gabinete Komisaun Veteranus nian ho membru polisia ida simu subsidiu $200, maibé sira entrega fali osan.
Molok ne’e, Koordenador Subsidiu Fim do Ano Munisipiu Dili, Luis da Costa hatete, iha dekretui lei uma-kain ne'ebé ho rendimentu $500 ba leten la simu subsidiu $200, tanba subsidiu $200 ne'e aplika ba uma-kain ne'ebé vulneravel.
Maibé, nia dehan, iha terenu, iha uma-kain balun ne’ebé sira-nia membru ho kargu Diretór Nasionál iha ministériu balun ho salariu $700 mós simu subsidiu.
"Ha'u hetan duni no akompaña iha terrenu Diretór Nasionál no polisia balun simu hotu subsidiu ne'e. Purezemplu, iha polisia eskuarda iha munisipiu Dili nian konsege simu duni $200, to'o ikus koordena mai ha'u hodi fó orientasaun ba Xefe Suku sira fó presaun maka’as konsege fó fali. Maibe Diretór Nasional lina ministerial balun ho salariu $700 mós simu $200, to'o agora seidauk fó fali,” dehan nia iha salaun MSSI, Kaikoli, Kinta (15/12).
Luis informa tan, iha mós Diretór Nasional balun ne'ebé iha prosesu pagamentu haruka sira-nia feen ka oan mak ba simu subsidiu.
"Ami haree direita, Diretór Nasional balun simu hotu, dala-ruma sira haruka feen ba, la'e oan mak ba, maibé sira-nia osan la deklara sai katak, ho rendiementu liu $500 maibé sira nonook de’it. Iha mós Diretór Nasional balun ba simu, la deklara sai rendiementu, maibé ikus mai ami buka hatene tuir sira-nia salariu, balun $700, balun $600," nia dehan.
Bainhira pagamentu remata, nia dehan, ekipa sei hato'o ba superior sira hodi bele prosesa.
“Atu prosesu halo oinsa ne'e kompetensia nasionál, ekipa ezekuta de'it programa no mós fahe informasaun ba sira. Ministeriu relevante sira ne'ebé toma atensaun ba subsidiu ne'e, parte Komisaun Anti Korupsaun no Provedoria Direitos Humanos no Justica no Tribunal mak iha kompetensia atu buka tuir, halo prosesu tuir lei,” dehan nia.
