“Karik prosesu ne’e tama ona ba Tribunál no entrega ba juiz titular, juiz marka julgamentu nia (Kalbuadi) la mai mak hafoin mandadu kapturasaun,” esplika Tilman relasiona ho hanoin balun atu halo kapturasaun ba atual deputadu Kalbuadi.

Tuir Tilman, Ministériu Públiku bele hatun mandadu detensaun ba Kalbuadi atu presta deklarasaun iha Ministériu Públiku.

“Atu garante presta deklarasaun ne’e bele detein, maibé tenke ba juiz laos ba fali Ministériu Públiku,” nia hatutan.

Tuir nia, prosesu inkeritu iha MP bele haan tempu to’o fulan 6 ka bele to’o tinan ida.

Hafoin prosesu investigasaun remata, MP sei haruka akuzasaun ba tribunal hodi entrega ba juiz prosesu hafoin juiz prosesu hato’o notifikasaun ba Parlamentu Nasionál hodi husu hasai imunidade.

“Maibé agora ne’e iha faze inkeritu nia laran, Ministériu Públiku notifika Kalbuadi atu mai presta deklarasaun iha Ministériu públiku. Tribunál haruka notifikasaun ba Parlamentu Nasional atu hasai imunidade ne’e kazu ne’e iha ona tribunál, (bainhira) prosesu investigasaun iha Ministériu Públiku hotu ona,” Tilman afirma.