Nune’e, liña ministériu ne’ebé sei mamuk Ministériu Finansas fó konfiansa ba Diretór Jerál tanba iha esperiénsia ezekusaun OJE 2018 ho transparénsia, efikásia no efisiénsia ba ezekusaun maski seidauk tutela membru Governu ruma asume pasta ministériu ne’e.

Ministru Estadu no Ministru Prezidénsia Konsellu Ministru, Hermenegildo ‘Agio’ Pereira dehan, Konsellu Ministru aprova rezolusaun kona-ba ezekusaun orsamentu estadu 2019, diploma ne’e aprova ona norma ho prosedimentu ba ezekusaun.

“Regulamentu ida ne’e hanesan instrumentu ida ne’ebé di'ak hodi kumpre loloos prinsípiu no liña orientadora sira ne’ebé fiksu ona iha OJE 2019 nian”, dehan nia, iha Palásiu Governu, horisehik.

Monitorizasaun ho relatóriu ne’ebé aplika ba OJE 2019 nian, ne’ebé importante tebes halo akompañamentu ida ho rigorozu ba adekuadu ezekusaun ba orsamentál.

Entretantu, Ministra Finansas Internu (MF), Sara Lobo Brites dehan, dekretu ne’e ámbitu atu kobre liña ministériu sira, inklui ajénsia autónoma instituisaun Estadu ho munisípiu sira.

Governante ne’e deklara, Governu sei ezekuta orsamentu ho efisiénsia, transparénsia no akutabilidade ho rigór iha OJE 2019 nian. Nune’e, Ministériu Finansas halo kontrolu atu instituisaun Estadu tenke kumpre ezekusaun orsamentu.

Sara Hatutan, esperiénsia Governu iha OJE 2018 promulga liña Ministériu ne’ebé mamuk ezekuta orsamentu ho transparénsia no akutantabilidade.

Nune’e, iha ezekusaun OJE 2019 nian, Ministériu Finansas fó konfiansa totál ba liña ministériu sira sei mamuk atu ezekuta sira nia orsamentu, maski seidauk iha membru Governu ne’ebé lidera ministériu ne’e.

Liña ministériu ne’ebé to’o ohin loron sei mamuk maka Ministériu Interiór (MI), Mistériu Turizmu (MT) Ministériu Komérsiu Indústria no Ambiente (MKIA), Ministériu Planeamentu Investimentu Estratéjiku (MPIE), no Ministériu Petróleu Rekursu Minerais (MPRM).