Diretór Ezekutivu TIC Timor, Venáncio Pinto hatete, Timor-Leste hanesan nasaun jovem ida ne'ebé foin hetan nia indepedensia ba tinan 22, maibé tenke infrenta ho era globalizasaun teknolijia, ne'ebé obriga atu halo kompetisaun teknolijia modernu iha aspetu oioin hanesan funsionametu públiku, ekónomia, edukasaun no seguransa.
Tanba ne'e, iha seminariu ne’e, objetivu prinsipal mak oinsa atu halo transformasaun dijitalizasaun to’o tinan 2032, ne'ebé ko'alia kona-ba sentru dadus, konektividade, sibernetik no saberseguransa ne'ebé nu’udar pakote ida.
“Transformasaun dijital nia asesu baziku mak ita ko'alia sentru dadus, ita ko‘alia kona-bá rede konektividade, sibernetik para oinsa bele proteje dadus sira ne'ebé integradu mai ona iha sentru dadus atu bele seguru," dehan Diretór Ezekutivu TIC Timor iha Salaun CCD, Dili, Kinta ne’e (20/02/25).
Iha fatin hanesan, Ministru Transporte no Komunikasaun, Miguel Marques Gonçalves Manetelu hatete, transformasaun Dijital la’ós ona konseitu futurístiku nian.
“Transformasaun Dijital sai ona konseitu horseik, ohin loron, akontese dadaun no sei kontinua iha mudansa kada loron. Ita moris dadaun ona iha era ida ne'ebé iha mudansa bo’ot, tanba konsekuensia husi mudansa iha teknolojia dijital. Mudansa ida ne'e, kuaze troka ita nia moris tomak ka maneira moris nian husi oinsa ita servisu, oinsa ita komunika, oinsa ita estuda ka apriende, oinsa ita hola sasan to'o oinsa ita hanoin,” katak Ministru.
Governante ne’e hatutan, tanba ne'e mak, MTK liu husi nia ajensia autónomas no diresaun administrasaun direita nian, komprometidu atu moderniza administrasaun públika liu husi teknolojia dijital, kontinua ho projetu konetividade nasional (NCP), hodi habelar konektividade rede internet iha instituisaun governo, eskolas no klinikas.
Nia Subliña, kontinua kria Plataforma dijital oin-oin hodi hadi’a efisiensia, transparensia no asebilidade, ativamente regula no tau matan ba setór telekomunikasaun liu husi promosaun kompetisaun justa, hodi asegura kualidade no kompetetividade.
Hodi kontinua garante no asegura katak sidadaun idaidak hetan protesaun husi nia dadus pesoál no senti seguru iha nia komunikasaun no interasaun iha espasu dijital nian.
