Primeiru-Ministru (PM), Kay Rala Xanana Gusmão hala’o observasaun bá projetu emerjénsia reabilitasaun estrada ligasaun husi Suku Taiboko, Sub Rejiaun Pante Makasar, kobre Suku Usitaku, Sub Rejiaun Nitibe, to’o suku Lela-Ufe, Sub Rejiaun Nitibe, Rejiaun Administrativa Espesiál Oecusse Ambeno (RAEOA).
Xefe Governu halo observasaun bá projetu ne’e tanba Prezidente Autoridade RAEOA, Rogério Tigao Lobato rasik mak husu, iha ámbitu vizita durante loron 5 hahú hosi 17-21 Fevereiru iha RAEOA.
“Ha’u mai to’o iha ne’e tanba Prezidente Atoridade mak husu atu haree estrada ne’e. Povu iha área rurál presiza tebtebes maka infraestutura bázika. Ha’u kontente tanba estrada ne’e reabilita ona,” dehan PM Xanana liu husi Komunikadu ne'ebé Online INDEPENDENTE asesu iha Pájina ofisiál Primeiru-Ministru Kay Rala Xanana Gusmão, Kinta (19/02/25).
Nune'e, Xanana apresia ho Prezidente Autoridade RAEOA, Rogério Tiago Lobato nia servisu maske seidauk halo buat barak, maibé konsege ezekuta projetu emerjénsia reabilitasaun estrada ne’e hodi fasilita di’ak liu-tán movimentu komunidade, liu-liu ferik no katuas sira atu bele transporta sira-nia produtu bá Oecusse vila hodi bele fa’an atu bele sustenta moris.
Primeiru-Ministru rekomenda bá Autoridade atu bainhira reabilitasaun ne’e konklui 100%, kontinua kedan ho fui semente no la presiza nahe alkatraun tanba movimentu transporte públiku iha suku hirak ne’e ladún barak.
Durante prosesu reabilitasaun, Diretór Kompañia Rynaldós Unip Lda, Rofino da Costa Rao sempre halo uluk diálogu ho komunidade no hetan apoiu másimu liu-liu iha kooperasaun di’ak tebes entre komunidade ho tékniku sira no laiha impedimentu ruma, nune’e fiar katak sei konklui tuir kontratu ne’ebé iha.
Durante observasaun, komunidade ho kontente hein hodi simu Primeiru-Ministru iha sira-nia fatin hodi agradese tanba bele asesu bá estrada.
Antes ne’e, Prezidente Autoridade RAEOA, Rogério Tiago Lobato hateten katak, projetu reabilitasaun estrada ne’e ezekuta tanba hetan orientasaun husi Primeiru-Ministru hodi bele tulun movimentu komunidade iha área izoladu.
Reabilitasaun emerjénsia bá estrada husi bairru Oetaku, Suku Taiboko kobre Suku Usitaku to’o Suku Lela-Ufe, ezekuta husi kompañia Rynaldós Unipessoal Lda, ho distánsia kilómetru 14,343 no loke lu’an metru 7 atinje ona 46%.
