Sekretariu Estadu Komunikasaun Sosial Expedito Loro Dias Ximenes hateten, programa distribuisaun jornal ne’e programa IX governu Konstituisional nian, ne’ebé hahú ona iha tinan 2024.
Tanba ne’e, iha tinan 2025, Governu kontinua halo kooperasaun ho média konvensional tanba tuir avaliasaun husi ekipa SEKomS nian katak programa distribuisaun jornal iha duni benefisiu ba sosiedade sira.
“Molok ami atu kontinua distribuisaun ami nia ekipa halo avalisaun iha munispiu sira iha parte leste, oeste no sul atu rona, oinsa komunidade nia hanoin no nia avalisaun ba iha jornal ne’ebe distribui ba. Nune’e, sira hatete katak maioria sira presiza nafatin jornal atu lee,” dehan Expeditu ba Jornalista sira iha Salaun PCM Palasiu Governu, Kinta (20/02).
Governante ne’e hatutan, maske ho avansu teknolojia ne’ebé iha, ema barak hare ona informasaun husi televizaun no telemóvel android maibé jornal nafatin importante atu transmite informasaun ba iha públiku.
Iha fatin hanesan, Diretór Ezekutivu Timor Post, Jacob Ximenes hatete, liu husi kooperasaun ne’e, asume responsabilidade ida atu kontinua transmite informasaun ba iha sosiedade hotu.
Nia parte hato’o agradese bá IX Governu tanba kontinua ápoiu media konvesional sira, maske antes ne’e sira hasoru difikuldade oioin maibé sei la hamate sira nia vontade atu distribui Jornal ba munisipiu sira.
“Hodi Timor Post nia naran nafatin agradese ba governu dasia tanba fó suporta nafatin bá media konvensional sira, liuliu ba media Timor Post, ne’e hanesan responsabilidade ida, atu assume, atu hatutan informasaun ba ita nia sosiedade hotu-hotu, mesmu iha difikuldade barak ami sei hasoru hanesan mós tinan kotuk maibé la hamate mai nia hakarak no objetivu importante jornal to’o iha komunidade sira nia leet,” katak Diretór Ezekutivu.
Enkuantu, media konvensional lima (5) ne’ebé asina nota entendimentu ho governu mak, Jornal Diario INDEPENDENTE, Timor Post, Suara Timor Lorosa’e, Dili Post no Diario Nasional.
Entretantu, ba distribuisaun ne’e kada media ida sei distribui ezemplar 100 ba munisipiu 12.
