Sekretariu Estadu Komunikasaun Sosial Expedito Loro Dias Ximenes hateten, dadaun ne’e SEKomS iha ona naran figura na’in tolu ne’ebé sei aprezenta ba Konsellu Ministru, iha semana oin, no Konsellu Ministru mak sei deside figura hirak ne’e tuir misaun no vizaun ne’ebé RTTL,EP presiza.

“Iha ona figura rua ka tolu, no ha’u sei aprezenta ba Konsellu Ministru iha semana oin. Husi naran sira ne’e Konsellu Ministru mak sei deside sé mak priense rekezitus tuir misaun no vizaun ne’ebé RTTL presiza,”dehan Sekretariu Estadu Komunikasaun Sosial ba Jornalista sira iha salaun PCM Palasiu Governu, Kinta (20/02).

Governante ne’e hatutan, tuir dekretu lei númeru 42/2008, artigu Nú-13 hateten, ema ne’ebé atu sai membru konsellu RTTL,EP, ema ne’e labele mai husi funsionariu públiku no labele sai dirijente partidu pólitiku.

“Sé bainhira membru konsellu RTTL, EP mak dirijente hela iha Partidu pólitiku, funsionariu públiku ruma, ne’e bolu imkompatibilidade katak la inkompartibel atu halo nia funsaun. Tanba Prezidente RTTL, EP mós dirijente partidu ida maka nia inkompartibel atu hala’o nia funsaun ida ne’e,”tenik SEKomS.

Ho nune’e, Governante ne’e hatutan, ema ne’ebé atu sai membru ba Konsellu RTTL, konserteza tenki iha esperensia no komprende kona-bá servisu media no jestaun empreza media nian, tanba RTTL,EP, ne’e media estadu nian.

Entretantu, rekorda katak, Prezidente RTTL,EP José Belo “Taraleu” simu pose iha tinan 2021, iha mandate oitavu Governu.

Nune’e, José Belo assume knar nu’udar Prezidente RTTL,EP ba mandatu tinan haat, hahú husi tinan 2021 to’o 2024.