Vigario Jeral Arkedioseze Metropolitano Dili, Padre Graciano Santos Barros informa, prosesu konstrusaun ba Igreja Aimutin paradu tanba failansu balun.

"Igreja Aimutin ita hatene katak paradu hela tanba iha kestaun teknika iha ne’ebá. Ne'ebé Igreja rasik husu ADN atu halo estudu fila fali sasan balun faila iha ne'ebá tekniku no agora rezultadu estudu iha parte governu, ami entrega ona," dehan nia hafoin hasoru Vise Primeiru Ministru, Mariano Assanami Sabino, iha Palásiu Governu, Kinta (20/02).

Parte Igreja, nia dehan, intrega ba ADN tanba Kardeal mak hakarak haree failansu ne’ebé iha.

“Molok atu hahu fila fali tenke haree sasan sira ne'ebé mak liu tiha ona, tenke finaliza hafoin, bele hahu foun fali. Entaun rezultadu estudu husi ADN agora iha hela parte governu ninian, liu-liu iha Gabinete Apoiu Sosiedade Sivil ho vise Primeiru Ministru ba asuntu ida ne'e.”

Kona-ba kontrusaun igreja paradu iha sa tinan, Padre ne’e dehan, nia la lemrbara konstrusaun Igreja ne’e paradu iha sa tinan, maibé hafoin Covid-19 paradu.

"Igreja hakarak kontinua kuandu asuntu ne'ebé mak liu ne'e, liu-liu liga ho orsamentu no mós konstrusaun tekniku iha balansu iha ne’ebá, tenke rezolve hotu tiha mak ita foin hahú, atu nune'e labele kahur asuntu sira ne'ebé mak pasadu tiha ona no ida ne'ebé mak atu mai," katak nia.