Komunidade Justo de Oliveira, hatete, Timor-Leste ukun-aan tinan 22 ona maibé Governu la tau matan ba infraestrutura iha Suku Com ne’ebé harii kedas iha tempu okupasaun indonezia nian.

“Ami la ejize ba Governu atu hadi'a, maibé aset ne'ebé husik hela iha tempu Indonézia, sei bele karik planu hadia ona, atu nune'e, bele funsiona ho di'ak hodi fasilita ró ki'ik no boot tula sasán mai iha Lospalos liu husi Portu Com,” haktuir komunidade ne'e iha Portu Com, Sábadu ne’e (22/02).

Nia hatutan, portu Com, vizitante sira husi nasional no internasional mós tama sai iha portu ne’e, hodi hasai imajen furak natureza tasi no rai-henek mutin, maibé haree ba infraestrutura ne'e,  komunidade sira sente triste.

“Ami propoin nafatin ba Governu atu tau matan hodi hadi'a ona Portu ne'e, atu ami Nia oan sira bele utiliza iha loron ikus,  tanba daudauk ne'e, malae sira barak mak mai iha fatin ne'e,” sujere Justo.

Iha fatin hanesan estudante Bazika Filial Com, Deonozio Magalhães, Sente triste ho infrastrutura Portu Com ne'ebé abandona kleur.

“Ami hanesan estudante Com, maske ho idade sei ki'ik, ami mós husu ba estadu atu rehabilita ona Portu Com ne'e, atu iha future, ami bele ona utiliza ba atividade ekonómika povu Lautem, espesiál iha Komunidade Suku Com,” relata nia.

Xefe Aldeia Muapusso Florentino Monteiro hatete, portu Com nu’udar fatin turizmu ne'ebé koñesidu iha Lautem, maibé kondisaun dadauk ne'e aat ona,

Nia dehan, durante ne'e ema barak mak halo ona survei ba fatin refere, maibé to'o ogora seida’uk realiza.

Tanba ne’e, husu ba governu atu hadi'a ona atu nune'e turista sira ba vizita bele hatudu imajem ne'ebé furak.

"Sim ita nia portu Com nudar fatin turizmu ida maibé nia kondisaun aat oan, iha ne’e ami hare durante ne'e ema barak mak mai survei maibé to’o agora seidauk realiza,”tenik Xefe Aldeia.