Tuir komunikadu ne’ebé Online INDEPENDENTE asesu iha Pajina do Governu haktuir, Deklarasaun Estratéjika Orsamentál no tetu indikativu despeza nian ba Orsamentu Jerál Estadu tinan 2026 (OJE 2026) aprezenta husi Ministra Finansas, Santina José Rodrigues F. Viegas Cardoso.
Hafoin halo análiza, governu deside hodi aprova Deklarasaun Estratéjia Orsamentál no tetu despeza indikativu ba Orsamentu Jerál Estadu 2026 (OGE 2026).
Instrumentu sira-ne’e, ne’ebé prevee ona iha Kuadru Orsamentu Jerál Estadu nian no Lei Jestaun Finanseira Públika (Lei Nú. 3/2025 loron 23 fulan-Abril), orienta polítika fiskál ba médiu prazu, garante koerénsia entre objetivu dezenvolvimentu nasionál no rekursu sira ne’ebé disponivel, no estabelese limite despeza nian ba setór oioin Administrasaun Públika nian.
“Nune'e gastu indikativu globál ba Orsamentu Jeral Estadu 2026 nian estabelese iha dolar amerikanu biliaun 1,85. Distribuisaun tetu agregadu Orsamentu Governu Sentrál iha Orsamentu Estadu 2026 bazeia ba setór estratéjiku sira ne’ebé define ona husi Programa Governu no Planu Estratéjiku Dezenvolvimentu, ho 36% aloka ba Setór Enkuadramentu Institusionál, 28% ba Setór Kapitál Sosiál, 28% ba Dezenvolvimentu Infraestrutura ba Ekonómiku 7% Dezenvolvimentu no 1% ba Boa Governasaun no Kombate Korrupsaun,”dehan Komunikadu refere.
Entretantu, Ministra Finansas mós aprezenta previzaun kreximentu ekonómiku 2,7% hosi PIB ba tinan 2026, iha kontestu konsolidasaun orsamentál, hafoin kresimentu kalkuladu 4,3% iha tinan 2025. Taxa inflasaun mantén iha trajetória tun, hein katak sei atinji 1,8% iha 2025, no sei estabiliza besik 2% iha tinan lima oin mai.
Enkauntu, kalendáriu prosesu orsamentál estabelese distribuisaun tetu dezagregadu ba entidade sira iha loron 4 fulan-Jullu, submisaun proposta ministeriál sira to’o loron 24 fulan-jullu, hala’o reuniaun Komisaun Revizaun Orsamentál entre loron 4 no 20 fulan-agostu, no submisaun proposta Orsamentu Estadu 2026 ba Parlamentu Nasionál to’o loron 12 fulan-Outubru, 2025.
