Tuir Negosiante Ikan, Tomas Inacio Pereira hatete, ikan ne’ebé sira faan, sira sosa husi peskadór sira, kada balde ida iha $150, maibé sira faan fali dala ruma loron ida hetan deit $20 to’o $30.
“Rendimentu ne'ebé maka ami hetan tuir tempu de’it, kada vez tempu diak ema $20 to’o $30, maibé dala ruma ema la sosa, ami lakon, tanba faan iha ne’e, la’ós ema rua de’it, maibé agora ne’e ema hotu-hotu faan ikan,”dehan nia ba Jornalista Online INDEPENDENTE, iha área Tasi-Ibun, Bebonuk, Segunda (30/06/25).
Nia hatutan, dala ruma mós sira lakon ka la hetan rendementu tanba ekipa konjunta husi SEATOU nian hetan sira faan iha dalan ninin, ekipa sira prende.
“Ami maka hetan uluk ekipa konjunta husi SEATOU nian, entaun ami lori halai, nune’e halo ikan fakar hotu,” nia haktuir.
Nia haktuir tan, kada balde boot ne'e, sira faan bele to’o loron rua maka foin hotu, tanba ema barak maka faan ikan iha fatin refere.
Iha sorin seluk, Negosiante Aljon Narobo Silveiro ne’ebé faan ikan iha Tasi-Ibun Pantai Kelapa hateten, loron ida sira hetan de’it maka $3 to’o $7. Nune’e, iha fulan-ida maka sira foin hetan $50 ou $100.
“Aat liu maka ami hetan ekipa Konjunta husi SEATOU, entaun ami lakon osan inan, tanba ekipa sira prende hotu ami nia sasan,”dehan, nia.
Nia realsa liu tan katak tinan ida ne'e sira ladun hetan rendementu kompara ho tinan kotuk.
“Iha tinan ida ne'e, ami faan to'o loron rua maka hetan rendimentu $5, ami ne’ebé fa'an iha ne'e, maioria maka hela iha kos, entaun ami jere ida ne'e la to'o. Iha tinan kotuk loron-loron ami hetan rendimentu to'o $50 no tun liu maka ami hetan rendimentu $25”hakotu nia.
