Antes ne’e, Prezidente PN, Arão Noe de Jesus Amaral hateten, relasiona ho lei rua ne’e Parlamentu sei rona husi parte Governu tanba alterasaun lei sira ne’e governu sai autór ba lei ne’e.

“Ami sei foti desizaun tuir opsaun ne’ebé iha, tanba sei rona mós opiniaun husi Primeiru Ministru liu husi ministériu ne’ebé relevante ba asuntu atu fó opiniaun saida maka presiza atu halo relasiona ba dekretu lei rua ne’ebé hetan veta,” dehan nia, iha PN segunda (2/9).

Iha fatin ketak, Ministru Reforma Lejizlativa no Asuntu Parlamentár (MRLAP), Fidelis Leite Magalhães hateten, lei rua ne’ebé Prezidente Repúblika veta ne’e iha kanál konstituisaun atu responde, liu husi reapresiasaun no konfirmasaun votu.

Tanba ne’e, Parlamentu Nasionál sei haree didi'ak kanál sira ne’e responde, hafoin rona Governu nu’udar proponente.

“Governu ho Parlamentu Nasionál sei konserta depois mak ita bele responde ba Tribunál Rekursu nia desizaun,” dehan nia, iha Kolmera, horisehik.

Kanál sira ne’ebé atu liu hodi foti desizaun ne’e konstituisaun fó dalan no agora sei iha hela prosesu nia laran. Tanba ne’e, iha tempu badak parte rua sei reuni atu Governu bele fó hanoin ba Parlamentu depois foti desizaun.