"Hakarak hatao’o votus felisitasaun ba Jornalista sira iha mundu tomak no espesialmente ba ba ha'u-nia oan Jornalista Timoroan sira hotu, ba imi-nia loron espesiál ohin,” dehan Taur Matan Ruak liu husi Komunikadu ne'ebé Online INDEPENDENTE asesu iha Pájina ofisiál Eis-Primeiru-Ministru Taur Matan Ruak, Sabado ne’e (03/05).
Eis Primeiru Ministru ne’e hatutam, loron 03 fulan-Maiu, nu’udar loron espesial ida ba jornalista sira, loron ne’ebé Nasoens Unidas adopta hanesan loron mundiál liberdade imprensa nian hodi fó hanoin ba nasaun hotu iha mundu tomak atu respeita no valoriza Liberdade Imprensa nian.
Tuir indise liberdade imprensa mundial nian ba tinan 2025 husi RSF, hatuur katak Timor-Leste nia índise liberdade imprensa iha númeru 39 ho pontu 71,79 husi total nasaun 180. Ida ne’e hatudu katak Timor-Leste nia índise liberdade imprensa monu iha ukun IX Governu nian.
“Ne’e hatudu katak liberdade imprensa iha prekupante nia laran, triste ho situasaun ida ne’e,”dehan nia.
Taur dehan, iha VIII Governu Konstitusionál ne’ebé Eis Prezidente ne’e lidera, fó liberdade ba imprensa sira hala'o sira-nia kna'ar ho livremente sem interevensaun ruma iha sira-nia redasaun, husu mak sira nia responsabilidade oinsá hato’o notísia ho loloos, imparsial, indepdente, tuir faktus no kode étika Jornalista sira nian, tanba Jornalista nu’udar pilar importante ida ba demokrásia nasaun ida nian.
“Hanesan Líder, hakarak apela nafatin ba Jornalista sira, hato'o nafatin lialos no lian hosi povu kbiit laek sira nian, embora nia parte hatene jornalista sira agora iha presaun nia laran hosi ukun nain sira,”tenika Eis PM ne’e.
Nune’e Taur Matan Ruak enkoraja nafatin Jornalsita sira, foti nafatin problema sosial, ekónomia ne’ebé povu hasoru iha ukun ida ne'e hanesan problema eviksaun forsada sem kria uluk kondisaun, problema nesesidade báziku, problema saúde, problema edukasaun no seluk tan.
Iha situasaun sira hanesan ne’e, Jornalista sira-nia papel importante tebes fó kontribuisaun oinsá tulun populasaun sira iha divulgasaun informasaun ne’ebe loos, justu, kredivel no mais edukativu atu ukun na'in sira rona no tau matan sira.
Tanba ne’e, Eis Prezidente Repúblika no Eis Primeiru Ministru ne’e agradese ba jornalista sira nia kontribuisaun durante ne’e hato’o ona informasaun ba públiku sira, maské hasoru difikuldades oioin iha terenu, maibé nafatin iha vontade, badinas no profisionalizmu.
