Xefe Governu agradese tebes ba asisténsia téknika husi JICA ba mitigasaun estragu husi dezastre naturais neebé akontese iha loron 4 Abríl 2021, neebé halo estragu ba infraestrutura sira.
Diretór Rejionál ba Ázia Pasífiku JICA, Shinya Tomio hateten, akompañadu husi Diretór Nasionál JICA iha Timor-Leste, Ko Goto no Enkarregadu Negósiu Embaixada Japaun nian, hasoru xefe governu atu hametin liu kooperasaun entre rai rua.
“Presiza tebes apoiu tékniku espesialista JICA nian ajuda re-dezeña infraestrutura sira neebé hetan estragu, nunee bainhira halo reabilitasaun fila-fali bele ho kualidade,” dehan nia, iha Palasiu Governu, Kuarta (24/11).
Shinya hateten, xefe governu mós husu atu JICA halo parseria metin ho Governu Timor-Leste, liuliu ho ministériu obras públika ba tempu naruk atu garante kualidade projetu sira iha tempu oin mai.
Enkuantu, Diretór Rejionál Ázia Pasífiku JICA sente onradu ba konvite hodi mai vizita Timor-Leste no iha oportunidade bele haree infraestrutura sira neebé hetan estragu.
“Daudaun nee Japaun hasae nivel kooperasaun ho Timor-Leste iha área lubuk ida, hanesan iha infraestrutura estrada, ponte, aeroportu, portuáriu no melloramentu sistema bee moos no apoiu mós bolsu estudu ba Timor oan sira ba estudu iha universidade sira iha Japaun,” tenik nia.
Diretór Rejionál Ázia Pasífiku vizita iha Timor-Leste durante loron 10 nia-laran, husi loron 15-25 Novembru 2021, vizita nee halao reuniaun ho Ministru Obras Públika, Salvadór Eugénio Soares dos Reis Pires no parte interesada sira seluk, inklui vizita ba lokalizasaun projetu kooperasaun JICA nian no observa mós estragu sira husi kalamidade 4 Abríl.