Iha Kuarta (31/08) dadeer, Elvis de Oliveira, defisiensia fiziku ida ho idade tinan 49, ho nia oan mane, Editonio de Jesus Eco de Oliveira, hean neneik bisikleta roda tolu husi nia hela fatin, Mascarinhas ba Bairro-pite. Edifisiu boot ida iha Bairro-pite sai nu’udar ninia tarjetu.

Bainhira to’o iha fatin para viaturas iha palasiu PR, Elvis hapara nia bisikleta, tuun no hahú dolar neneik hodi tama ba portaun palasiu. Editonio la’o neneik iha nia aman nia sorin.

Funsionariu palasiu PR ne’ebé haree prezensa aman ho oan ne’e ho lalais lori kedan sira ba fatin servisu Korespondensia Prezidensia Repúblika ne’ebé toma konta kona-ba kestaun apoiu PR ba sidadaun sira ne’ebé husu apoiu.

"Ha'u mai audensia ho Korespondensia Prezidensia Repúblika nian atu husu apoiu ba Prezidente Repúblika José Ramos Horta, kona-ba apoiu uma ba ha'u, tanba ha'u ema difisiensia, ha'u tama sai kost husi bairu ba bairu, no osan ne'ebé atu selu kost ne'e mós ha'u la hatene mai husi ne'ebé,” dehan Elvis hafoin aúdensia ho Korespondensia Prezidensia Repúblika, iha Palasiu Prezidensiál, Bairu-Pite, Kuarta (31/08).

Durante tinan hirak ne’e, Elvis dehan, nia hetan difikuldade boot atu selu osan kost no atende nesesidade uma-laran.

Situasaun mós hahú todan liu tan bainhira Elvis ho nia feen, Bendita Eco, hetan grasa hodi hahoris oan na’in haat; Rina Cristina de Jesus Eco de Oliveira, Editonio de Jesus Eco de Oliveira, Evitonia Maria do Rosario Eco de Oliveira, no Efrondini de Jesus Eco de Oliveira.

“Ami kost uluk iha Kintal Boot, selu $60 kada fulan, tahan to'o tinan ida resin. Ba fali Kintal Kiik kost tinan ida resin, selu $50 kada fulan. Kost fali iha Bundaran Nicolau Lobato fulan neen, selu $60 kada fulan. Sai fali ba kost iha Kintal Kiik kuaze tinan rua resin, selu $50 kada fulan, maibé fatin mak la sufisiente ba oan sira atu book an no halimar uitoan mós laiha, entaun tenke sai fila fali, mai kost fali Mascarinhas, Aldeia 03, ida ne'e besik tinan rua ona, selu $50 kada fulan,” dehan nia.

Atu atende nesesidade uma-laran nian, Elvis hala’o negosiu fa’an maskra iha area estrada-ibun BNU. Maibé rezultadu husi negosiu ne’e la sufisiente tanba nia mós tenke fasilita nia oan na’in rua ne’ebé tama ona eskola.

Nia oan feto dahuluk, Rina ho idade tinan 9 daudauk ne’e eskola iha eskola primaria ida iha Oekusse no tama ona tinan daruak, no Editonio ho idade tinan 7, eskola iha ensinu primaria Rumbia, Kaikoli, no tama tinan dahuluk. Tuir planu, iha tinan hanorin foun, nia oan feto Evitonia ho idade tinan 6 sei tama tan eskola.

Ho nune’e, Elvis dehan, iha fulan rua nia laran, Jullu no Agostu tinan ne’e, nia seidauk bele selu osan kost.

Ho situasaun ne’ebé obriga, Elvis foti desizaun hodi ba tuur iha estrada-ibun, hodi hein ema seluk nia laran luak atu soe netik osan rahun balun ba nia.

“Bainhira tuur luron, karik kolega ka ema ruma ne'ebé hakarak fó osan hanesan dollar $1 ka dollar $2, entaun ha’u rai hamutuk to'o $50 mak foin selu kost,” dehan Elvis.

Iha tinan hirak liu ba, Elvis dehan, nia la hasoru difikuldade ne’e tanba hetan apoiu husi governu ho montante osan $1.500.

“Foin lalais ma kami simu osan Covid-19 ne’e $200, ne’e de’it ona,” dehan nia.

Ho difikuldade ne’ebé nia hasoru, Elvis hein katak Prezidente Repúblika, José Ramos Horta, bele konsidera netik hodi fó apoiu ba nia ho nia familia.

Iha fatin hanesan, Korespondensia Prezidensia Repúblika, Mariano da Costa hatete, Elvis hasoru Korespondensia Prezidensia Repúblika hodi husu apoiu, maibé daudaun ne'e nia parte la simu ona proposta, nune’e sira sei hato’o pedidu audensia ho PR Horta nune’e Elvis bele hasoru direitamente ho Xefe Estadu.

“Depois Xefe Estadu karik despaxu ninia pedidu ida ne'e mak marka tempu, ajenda, haruka nia ho nia familia hasoru Xefe Estadu, iha ne'eba mak nia hato'o direitamente ninia susar ne'ebé durante iha nia moris laran, difikuldade saida mak nia hasoru,” dehan nia.

Nia hatutan, Elvis iha problema fiziku, iha ona na’in haat no nia mós hela iha kost, tan ne’e presiza duni atu hetan apoiu.

“Maibé dalan ne'ebé atu fó apoiu ne'e Xefe Estadu mak sei foti ida ne'e, hanesan Korespondensia Prezidensia Repúblika fasilita de'it dalan atu to'o ba iha Xefe Estadu. Pedidu ne'e ami ohin halo, entrega ona ba Prezidente Repúblika nia meza, depois mak haree took, bainhira mak hetan despaxu husi Xefe Estadu," katak nia.

Iha fatin ketak, Elvis nia tiu ida, Orlando da Costa Ximenes, dala-ruma haree nia subriñu tuur iha luron hodi husu ezmola.

Dala-ruma nia hakilar no hirus haree saida mak nia subriñu halo, maibé nia mós komprende ho Elvis nia kondisaun fiziku ne’ebé defisiente.

"Dala-ruma ha'u ho ha'u-nia feen hetan, loron kalan tuur ba husu ezmola, ha'u sempre hakilar, maibé la haluha tanba moris mak hanesan ne'e, buat ne'ebé ha'u fó, ha'u labele dehan ha'u fó. Maibé nu'udar subriñu ha'u sempre hanoin soe hela $0.10 sentavus, ha'u tenke soe hela tanba konsidera bin boot nia oan," dehan nia.

Nu'udar tiu, Orlando hatutan, nia sente triste bainhira haree Elvis tuur iha luron hanesan, tanba Elvis nia aman, António Oliveira, mós mate iha funu laran tanba defende ukun an.

“Maibé ita labele konta buat sira ne’e hotu,” dehan nia.