Iha inisiu, bazeia ba prosesamentu ba fatin akontesimentu husi Polisia Tranzitu Munisipiu Dili, kauza ne’ebé hamate Padre Abito mak uniku asidente (kecelakaan tunggal) bainhira Padre Abito ne’ebé tula hela feto ida ho insial MSR fila husi Dare.
Maibé tanba iha deskonfiansa husi familia no parte Dioseze Dili nian, liu-liu ba kanek hirak iha Padre Abito nia isin, ikus mai familia no parte Dioseze hato’o keixa ba Polisia Servisu Investigasaun Kriminal (PSIK) no husu mós atu halo prosesu autopsia ba mate-isin.
Hafoin loron hirak nia laran, PSIK konsege konklui ona investigasaun inisiu no simu ona mós rezultadu autopsia husi Departamentu Forensik, Hospital Nasionál Guido Valadares.
Bazeia ba dadus hirak ne’e, PSIK halo ona auto-notisia no submete ba Ministériu Públiku hodi hein prosesu tuir mai.
“Sasin balun ami hahú bolu hodi notifika sira no ami rona informasaun sira ne’e hanesan inisiál de’it, ba hirak ne’ebé mak antes akontesimentu no depois akontesimentu hatene informasaun ruma, ami rekoila tiha informasaun sira ne’e, tanba ne’e, informasaun báziku ne’e mak ami tau iha auto-notísia hodi submete ba iha Ministériu Públiku,” informa Portavoz Invetigador PSIK, Octávio da Costa Araújo ba jornalista sira iha nia knar-fatin, Kaikoli, Kuarta (31/08).
Octavio esplika, PSIK nia devér no obrigasaun mak submete ona prosesu ba MP no hein de’it delegasaun kompetensia husi MP atu halo investigasaun klean.
“Ami-nia dever, obrigasaun, ba rekolla dadus hotu tenke submete ba Ministériu Públiku mak foti desizaun atu delega kompetensia atu halo invetigasuan klean ba kazu Padre Abito nia mate, ne’e depende ba PJR atu delega ba autoridade invetigador hanesan ami, PSIK, ba iha Instituisaun Polisia sira seluk, tanba ne’e ita hotu hein,” katak nia
Hatan kona-ba bazeia ba rezultadu autopsia no rezultadu investigasaun inisiu karik iha indisiu ba krime iha kazu Padre Abito nia mate, nia hatan, katak kestaun ida ne’e seidauk bele fó sai ba públiku no rai ba segredu justisa.
“Dadus informasaun husi testamuña balun iha fatin akontesimentu no pasajeiru MSR ne’ebé lao hamutuk Padre Abito molok mate, ami rekolla no rona hanesan informasaun inisiál, sai hanesan dokumentu ida, iha semana kotuk ami submete tiha ona prosesu ne’e hotu ba iha prokuradór, ita hein de’it rezultadu,” nia afirma.
Iha parte seluk, finalista Fakuldade Direitu, Universidade Dili, José Lino Costantino Pereira hatete, bainhira familia matebian no parte Dioseze hato’o keixa ba autoridade investigadór hanesan PSIK, bele konsidera iha ona indisiu seluk ne’ebé deskonfia ba krime.
Nia hatutan, autoridade investigadór sei hala’o sira-nia servisu no hato’o auto-notisia ba Ministériu Públiku hodi aprezenta ba tribunal hafoin tribunal mak foti desizaun.
“Ema ruma mate mak familia la simu, hato’o ona keixa, ita bele konsidera iha indikasaun ba krime. Autoridade invetigador sira bele rekolla dadus hato’o auto-notisia ba iha Ministeriu Publiku hodi aprezenta ba tribunal mak bele foti desizaun katak kazu ne’e iha ligasaun ba krime ka lae,” katak nia.
Entretantu, tuir informasaun ne’ebé jornal INDEPENDENTE hetan husi fontes konfirmadu ne’ebé hatene kona-ba prosesu ne’e hatete, iha posibilidade kazu ne’e muda husi asidente ba omisidiu.
Fonte ne’e hatutan, PSIK hato’o ona auto-notisia ba MP no hein hela orden atu halo kapturasaun suspeitu sira, inklui mós MSR.
