Portavoz Sentru Integradu Jestaun Krize (SIJK), Odete da Silva Viegas hatete atulizasaun dadús iha loron ida ohn (9/4), total ema ne’ebé hala’o konfinamentu obrigatoriu hamutuk ema na’in 984, husi númeru ne’e iha Dili hamutuk na’in 820 no, iha munisipiu 130.

Konfinamentu volontariu iha Dili hamutuk ema na’in sia (9) no iha munisipiu na’in 25.

Odete hatete¸ dadús ohin nian iha aumentu, horisehik ema na’in 918, no ohin loron iha aumentu ba 984.

“Suspeitu ba COVID-19 horisehik na’in 49, maibé ohin aumenta na’in ida, entaun ohin loron suspeitu sa’e ona ba na’in 50,”dehan nia, liu husi konferensia imprensa, iha CCD, ohin, (9/4).

Odete dehan¸ husi númeru suspeitu ne’e provavel hein hela rejultadu laboratoiu ne’e na’in ida, pozitivu nafatin na’in ida, no negativu hamutuk na’in 48.

Hakarak husu ba sidadaun hotu iha rai laran, atu mantein disiplina hodi halo prevensaun, fase liman bei-beik, halo distansiamentu sosial no fiziku.

Ba sira ne’ebé ohin loron iha kaurentena laran atu mantein nafatin disiplina, karik la disiplina sei iha sansaun, aumentu loron kuarentena.