Portavoz Sentru Integradu Jestaun Krize (SIJK), Odete da Silva Viegas hateten, mediku Timor-oan ne’ebé hala’o estudu espesialidade iha Kuba, iha semana kotuk liubá na’in tolu maka tama kuarentena tanba halo kontaktu direita ho ema ne’ebé pozitivu OCIVID-19 ne’e.

“Ami simu informasaun iha semana kotuk mediku Timor-oan iha Kuba tama Kuarentena,” dehan nia, liu husi konferensia impresa iha CCD, ohin, (9/4).

Odete dehan, sira ne’ebé tama kuarentena ne’e la signifika katak hetan ona moras ne’e, maibé tuir regra katak ema ne’ebé halo ona kontaktu direita ho vitima pozitivu tenke tama, atu nune’e bele halo akompanamentu ba sira iha periode inkubasaun.

Timor-Leste ho Kuba durante ne’e iha akordu, tanba ne’e sira iha ne’eba Kuba maka sei atende. Evolusaun saúde sira na’in tolu nian seidauk iha kontaktu loloos semana oin depois maka parte SIJK bele informa fali ba públiku.