Suku 10 sei iha Eleisaun, Prezidente PN Husu Feto Prepara-aan Kompete Featured

By Cristina Ximenes Abril 18, 2024 204
Prezidente Parlamentu Nasionál, Maria Fernanda Lay. Foto:Dok. Prezidente Parlamentu Nasionál, Maria Fernanda Lay. Foto:Dok.

DILI: Prezidente Parlamentu Nasionál, Maria Fernanda Lay, husu feto sira prepara-aan hodi kompete iha eleisaun suku 10, ne'ebé sei realiza iha Abríl tinan ne'e.

Nia dehan, tanba lei iha ona, agora feto sira mak tenke prepara-aan atu kompete eleisaun ba suku 10 ne'ebé mai.

"Ha'u hatete lei iha ona, agora feto prepara-an atu kompete, la'os loron ida, kalan ida mak ita iha kapasidade prosesu ida," dehan Prezidente PN, iha Palasiu Prezidensiál, Bairru-Pité, horisehik.

Enkonraja feto maluk sira atu brani kandita-aan tanba feto mós iha kapasidade hodi kontribui ba Estau ne’e.

Antes ne'e, Sekretariadu Tékniku Administrasau eleitorál (STAE) hamutuk ho Ministériu Administrasaun Estatál (MAE) liu husi Diresaun Jerál Desentralizasaun Governu Lokál halo hela preparasaun no koordenasaun ba suku 10 ne'ebé tuir planu sei realiza iha fulan Abríl tinan ne'e.

"Data fiksu governu mak sei deside dekretu lei ruma," dehan Diretór Jerál STAE, Elviro Fernandes Moniz.

Tanba ne'e, STAE no MAE daudaun halo mós preparasaun seluk hanesan levantamentu dadus iha sentru votasaun sira iha suku 10 ho nia aldeia sira.

"Ita nia ekipa atu haree sentru votasaun sira asesu estrada, kondisaun eleitrisidade no fatin oinsá iha eskola ka sede aldeia, sede suku ka sentru komunitáriu ita presiza haree nune'e karik sira ne'e laiha presiza harii tenda ida ne'e ekipa sei halo hela levantamentu dadus," hatete nia.

Nia hatete, orgaun eleitorál rua ne'e, liu husi Diresaun Jerál Desentralizasaun Governu Lokál halo hela preparasaun ba nesésidade lójistika hanesan kuantidade transporte ne'ebé sei uza iha momentu eleisaun, orsamentu kombustivel no seluk tan.

Parte tékniku, planu no hein governu bainhira mak dekreta data fiksu ba eleisaun nian mak hahú halo rekrutamentu ofisiál eleitorál hamutuk 252 iha prosesu eleisaun to'o remata.

Nia afirma, orsamentu ne'ebé prevee ba eleisaun suku 10 iha tinan ne'e provizoriamente $182.709,50.

Nune'e, eleisaun suku tinan ne'e ba suku 10 ho ninia aldeia 53 kompostu husi Munisípiu Dili, postu administrativu Kristu Rei, Suku Ailok ho ninia aldeia lima, postu administrativu Dom Alexo Bebonuk, Madohi, no Manleuana ho ninia aldeia hamutuk 28, postu administrativu Metinaro Suku Mantela’o ho ninia aldeia neen.

Munisípiu Aileu, postu administrativu Laulara suku Bocolelo aldeia hamutuk haat, postu administrativu Aileu suku Lequitura, aldeia haat, Munisípiu Manatuto postu administrativu Laclo suku Laicore aldeia haat, suku Uma Caduac aldeia ida no postu administrativu Barique suku Sikone Diloli aldeia hamutuk rua, no Munisípiu Vikeke postu administrativu Ossu suku Builo aldeia haat.

Husi suku 10 no aldeia 53 ne'e tuir dadus provizóriu eleitór ne'ebé sei partisipa iha votasaun ne'e hamutuk 26.995.

 

Rate this item
(0 votes)

Independente Digital TV