Iha enkontru ida ne’e partisipa husi Sekretáriu Munisipál dos Asuntos Sociais no Organizasões Komunitária (SMASOC), objetivu husi re-ajustamentu atu kompleta estrutura, tanba maioria mudansa ba estrutura, iha nivel Suku, Postu Adminstrativu no Diretór Servisu Munisipais.
Sekretáriu Munisipál ba Asuntus Sosiais no Organizaseões Komunitária (SMASOC), Zeferino dos Santos Sequeira hatete, estrutura Komisaun Presija Re-ajusta hodi nune’e bele komisaun sira-ne’ebé iha baze bele hatene sira-nia kna’ar no responsabilidade, nune’e bainhira iha dezastre bele informa lalais ba Diresaun ne’ebé mak bele halo atuasaun.
Nia esplika, tanba enkontru ida-ne’e bele hamosu ideia no informasaun foun, nune’e bele halo servisu kona-ba Protesaun Sivil no Jestaun Dezastre Naturais ho di’ak iha terenu.
Maibé ko’alia mós kona-ba mapeamentu, tanba Diresaun ida ne’e foin maka estabelese no iha ona Autoridade Protesaun Sívil bele halo koordena ba malu oinsá atividade sira bele la’o iha terenu.
“Importante liu mak re-ajustamentu, tanba membru sira ne'ebé maka uluk ita estabelese barak mak muda ona fatin no balun laiha, ho ida ne’e mak oinsa ita bele re-ajusta filafali, nune’e sira nia naran bele tama fali iha ne’e,” Dehan nia liu husi Komunikadu ne’ebé INDEPENDENTE asesu, iha Pájina PAM Lautém, Kuarta (17/04).
Iha fatin hanesan, Diretór Servisu Munisipál Protesaun Sívil no Jestaun Dezastre Naturais (DSMPC no DN), Casimiro das Asunção Pires reforsa, iha enkontru ida ne’e ho objetivu, Servisu Munisipál sira bele servisu hamutuk ho entidade sira hotu, hodi halo re-ajustamentu ba ekipa, atu bele fó apoiu ba situasaun emerjénsia, liuliu bainhira mosu dezastre naturais iha Munisípiu Lautém.
Nu’udár jestaun dezastre Munisipais, fo avizu uluk ba ita-nia komunidade sira ne'ebé maka hela besik iha fatin risku, nune’e sira bele kuidadu sira nia an no bele muda fatin antes dezastre ruma.
Jenior Project Asisten IOM, Elvis Agostinho Sarmento relata, enkontru ida ne’e atu re-ajusta fila-fali servisu komisaun jestaun dezastre Munisipiu Lautém nian.
Tanba maioria ho estrutura mudansa, hanesan Xefe Suku, Adminstrador Postu no Diretór Servisu Munisipais sira ne’ebé mak balun foun, nune’e bele apár ho servisu ne’ebé antes hala’o iha Munisípiu Lautém.
Nune’e, iha enkontru ne’e mós, atu halo mapeamentu ba kolokasaun rekursu, liuliu ba parseria sira, atu haree Suku ida ne’ebé maka parseiru hala’o servisu iha Suku refere, nune’e mapa ida ne’ebé maka klaru iha Suku no Munisípiu, atu nune’e kolokasaun labele iha duplikasaun.
Aleinde ne’e, IOM ninia servisu lolos iha Munisípiu Lautém mak, haree liu ba iha kapasitasaun atu hasa’e koñesimentu, liuliu iha nivel estrutura sira iha Suku, Postu no Munisípiu, nune’e bele hatán jestaun risku dezastre iha nivel Munisípiu Lautém.
