Ministru Komersiu no Industria, Filipus Nino Pereira informa, kompaña rua asina ona kontratu ho governu no kada kompña prepara foos saka 2.500 hodi distribui.

Hafoin asina akordu, nia dehan, kompaña rua ne’e bele hahú ona rekoilla dadus tanba governu hakarak foos subsidiu ne'e ba to'o iha munisipiu sira no postu administrative ne'ebé vuneravel tebes.

"Ne'ebé espera katak ho subsidiu ne'e bele atende, hakmaan ita-nia konsumidor sira ho presu foos ne'ebé maka iha," dehan nia ba jornalista sira iha Bebora, Tersa (16/01).

Kona-ba orsamentu, nia dehan, MKI la preve orsamentu maibé governu fó foos saka 2.500 ba kada kompaña atu faan ba sira-nia kliente hodi faan iha merkadu.

Kona-ba marka foos ne’ebé kompaña rua ne’e sei fa’an, nia dehan, husi Creatif Furak kontinua fa’an foos kilograma 20 ho marka Beruang Merah. Enkuantu husi Alfa Dili fa’an foos kilograma 25 ho marka ne’ebé seidauk termina.

Ministru ne’e mós husu ba komunidade sira atu buka hodi sosa foos subsidiu iha loza husi kliente kompaña importador sira.

"Sim (loza estranjeiru labele asesu foos subsidiu), tanba ne'e mak ohin ami dehan mekanismu distribuisaun depende ba iha kliente husi kompña importador sira. Alfa Dili iha nia kliente rasik inklui mós ho Creatif Furak,” dehan nia.

Iha oportunidade ne’e, Ministru husu ba kliente sira ne’ebé sosa tutan foos husi kompaña importadór atu labele halo manipulasaun ba folin foos.

"Labele tan manipula tanba ida ne'e foos subsidiu ne'ebé mak ba ita-nia inan-aman sira ne'ebé presiza tanba sira-nia kapasidade kbiit kompra ne'ebé la to'o," dehan nia.

Molok ne’e, Ministru Filipus informa, governu deside hodi asina tan kontratu ho Kompaña Kreatif Furak tanba kompaña refere hahú subsidiu foos faze dahuluk husi fulan Outubro to'o Dezembru ho di’ak.

Enkuantu ba kompaña Perisos, nia dehan, MKI sei haree lai tanba iha implementasaun faze dahuluk, kompaña ne’e obriga kliente sira sosa mós sasa sira seluk.

"Ita sei haree fila fali tanba ida Perisos ne'e iha problema uitoan tanba aleinde sira distribui mais sira mós obriga kliente sira seluk par atu faan mós mina, mie, masi-midar, ne'ebé ita ladun satisfas ho saida mak sira halo. Ba ida ne’e mak ita deside Loja Creative Furak ho Alfa Dili," dehan nia.

Kompaña Kreatif Furak, nia dehan, sei mantein ho foos marka Beruang Merah 20kg ho folin $9. Enkuantu Kompaña Alfa Dili sei faan foos 25kg ho folin $11.50.

Tuir tarjetu ne’ebé Konsellu Ministru aprova, nia dehan, subsidiu foos ne’e sei remata iha fulan Marsu tinan ida ne’e.