Tempu besik sei servisu hamutuk ho operador telekomunikasaun sira hanesan Timor Telekom, Telekomsel no Telemor atu fasilita komunikasaun hodi manda mensajen ba kliente sira, atu manda númeru rejistu kontador mai iha Eletrisidade Timor-Leste (EDTL).

“Ita sei kria númeru ida atu nunee kliente sira bele manda sira nia númeru rejistu kontador nian, atu nunee EDTL bele manda token ka pulsa ba sira ense iha uma deit,”dehan nia, iha Edifisiu EDTL, horisehik.

Salvador hateten, parte tekniku sira halo ona kalkulsaun aritmetika katak govenu bele fó subsidiu ba kliente hamutuk rihun 160,555, kada kliente bele hetan token $15 kada fulan iha periodu Estadu Emerjensia ida ne’e.

Politika ida ne’e governu implementa bazeia ba rezolusaun ne’ebé aprova ona iha Konsellu Ministru iha semana kotuk liuba, oinsá atu evita sidadaun sira labele halo movimetasaun iha fatin publiku hodi prevene moras Corona Virus ne’e daet.

Planu ne’e trasa ona, maibé sei iha hela faze preparasaun, parese loron tolu ka haat hanesan ne’e kuandu konklui ona kliente sira sei simu token ka pulsa iha ida-idak nia fatin, tanba ne’e husu ba kliente tomak atu pasensia oituan.