Diretór Ezekutivu Luta Hamutuk, José Alves da Costa hatete, boxing ne’e talentu hotu, ne’ebé MJDAK tenke dezenvolve área sira-ne’e ho di’ak oinsá forma mós sosiédade ida-ne’ebé iha responsabilidade.
“Boxing ne’e talentu hotu, ne’ebé MJDAK tenke dezenvolve área sira-ne’e ho di’ak oinsá forma mós sosiédade ida-ne’ebé iha responsabilidade, sosiédade ida-ne’ebé forte no fizikamente no mós iha mentál, nune’e iha kompete (eventu) ne’ebé de’it. La’ós hanesan sekilas ita loke ring, tanba deit na’in-rua sadik malu, depois hotu tiha taka fali,” Dehan Diretór Ezekutivu Luta Hamutuk, José Alves da Costa ba jornalista sira iha nia knaar fatin Faról, Segunda (08/04).
Nia dehan, maibé buat ne’e tenke sai hanesan permanente fatin ba treinu nini’an, fatin ba ema atu expresa sira-nia talentu sira-ne’ebé iha hodi bele partisipa eventu sira ne’ebé mak loke.
Maibé Luta Hamutuk husu, labele lori ida-ne’e atu taka problema seluk ne’ebé povu infrenta, problema hamlaha, ai-moruk laiha, professor sira laiha maibé kontinua ezame, eletrisidade mate lakan, bee-moos, estrada iha problema lubuk ne’ebé presiza rezolve ne’ebé husik ba Ministériu ida-idak hala’o ninia servisu.
Tanba boxing ne’e buat kiik ida husi nasaun ida-ne’e hanesan anima sosiedade sai professional bele tuir kompetisaun iha rai-li’ur hodi nasaun ida-ne’e nia naran ba oin.
“Ita iha MJDAK ninia programa loloos ba ida-ne’e, ita tenke promove talentu atletiku sira-ne’ebé la’ós tuku malu de’it, halai nini’an, haksoit ninian, nani bee nini’an, nani tasi nini’an neebé ita tenke promove bei-beik, ita tenke fó oportunidade ba joven sira-ne’ebé hakarak inklina aan iha kareira sira-ne’e, kategória kareira profesionalizmu, entaun ita tenke apoiu ba joven sira-ne’ebé iha inisiativa hakarak inklina aan iha parte desportu ne’ebé deit,” Nia hatete.
Nia afirma, MJDAK ninia responsabilidade ba ida-ne’e mak tenke implementa, ne’e importante nafatin, tanba nasaun hotu-hotu laiha ida mak ses aan husi desportu ne’ebé Governu tenke iha polítika di’ak.
Entretantu, iha fatin ketak Diretór Asosiasaun Hak, Feleciano da Costa Araújo hatete, inisitiva boxing foin lalais ne’e influénsia atu hatudu ba governu sira katak nu’udar sidadaun la depende ba sira, bele halo desportu sira hanesan ne’e.
Nia hatete, ema barak lansa dehan mekanizmu boxing ne’e mak foin redus violénsia, la’ós ida-ne’e, maibé divertimentu hanesan ne’e meius ida.
“Atividade boxing ne’e ema influénsia sira mak halo, ne’e la’ós governu mak halo, ne’ebé ba hau ministériu relevante liu-liu MJADK nia laiha inisiativa ida, to’o agora ne’e jogu saida mak nia halo, tanba ne’e governu rasik presiza tau atensaun ba ida ne’e,” tenik nia.
