“Tratadu Fronteira Marítima asina definitivamente, maibé seidauk iha ratifikasaun, ne’e maka ita ezije atu Parlamentu Nasionál tenke lalais halo ratifika ba tratadu ne’e”, dehan Diretór Ezekutivu FONGTIL, Daniel Santos do Carmo, iha Timor Plaza, horisehik.

Nia esplika, presiza hetan ratifikasaun lalais hodi bele hakat ba negosiasaun seluk. Demora ne’e la di’ak, tanba ladún hatudu TL ninia performa hanesan Estadu TL ninia konsiderasaun ba asuntu nasionál sira iha kontestu ne’e.

Iha fatin hanesan, Diretór Ezekutivu Asosiasaun HAK, Manuel Monteiro hateten, sosiedade sivíl sira halo avaliasaun ba Parlamentu Nasionál ninia servisu liu-liu V lejizlatura ninia situasaun polítika la estavel. Membru parlamentu sira ne’e hotu ne’e laiha intensaun ka laiha hanoin ne’ebé oinsá atu dezenvolve povu ne’e ninia futuru.

Tanba ne’e, konsentra liu ba ajenda polítika, maibé la fó prioridade ba interese nasionál ne’ebé loloos boot liu kona-ba ratifikasaun Akordu Tratadu Tasi Timor ninia hodi halo esplorasaun di’ak liu tan ba riku sira iha tasi laran.

“Ekonomikamente ita dependénsia ba rekursu iha tasi laran ninia boot liu duke rekursu sira seluk. Loloos deputadu sira ne’e tenke halo diskusaun tau interese maka’as liu ba asuntu ne’ebé liga ho ita nia ekonomia ba diversifikasaun ekonómiku duke asuntu polítika”, dehan nia.

Nia hatutan, saida maka agora daudaun mosu iha Parlamentu Nasionál, asuntu polítika maka domina maka’as liu fila fali. Tanba ne’e, oinsá maka atu tau matan ba destinu nasaun no Estadu ninia, liu-liu kona-ba lei sira balun sira ne’ebé seidauk iha hodi garante produsaun ekonómika iha rai laran bele la’o di’ak liután.