Loron 100 ne’e sai hanesan sasukat hodi sukat kapasidade membru governu sira nian, karik laiha mudansa signifikante ruma ne’ebé governante sira halo iha kada ministériu, primeiru ministru tenke halo avaliasaun ba sira nia dezempeñu servisu.
“Atu halo remodelasaun ka lae ne’e kompeténsia Primeiru Ministru nian, maibé tuir ha’u nia haree governante balun laiha kapasidade. Tanba ne’e, xefe governu tenke halo avaliasaun iha loron 100 ne’e nia laran”, dehan Prezidente Bankada PUDD, António de Sá Benevides, iha Uma Fukun PN, horisehik.
Nia hatutan, halo analojia ida katak bisikleta nia roda tenke monta iha bisikleta, labele monta fali ba karreta ka motór. Hanesan mós ho estrutura governu sira tenke monta tuir sira nia background estudu no esperiénsia servisu.
Nia observasaun ba estrutura governu ne’e ministra no ministru balun nia kapasidade públiku duvida hela, tanba ne’e presiza tau matan karik labele tenke remodela hodi tau ema seluk ne’ebé iha kapasidade hodi halo jestaun ba rekursu nasaun nian.
António dehan, Primeiru Ministru hatene hela maibé tanba demokrasia husik situasaun ne’e la’o, entaun nia rasik kontra ona prinsípiu tanba nia ema ida ne’ebé onestu, umilde no vizionáriu ba konstrusaun Estadu ne’e.
Haree ba membru governu balun ne’ebé PM monta ba kada ministériu ne’e balun la ‘pas’ tanba haree husi kapasidade, kualifikasaun ba integridade pesoál balun ne’e la merese maibé ne’e husik ba de’it, ne’ebé sei estraga mós imajen xefe governu iha futuru.
Programa governu ne’ebé hetan ona aprovasaun ne’e ba PUDD la preokupa, tanba programa hirak ne’e foti husi Planu Estratéjiku Dezenvolvimentu Nasionál (PEDN), ne’ebé programadu ona hein modifika buat balun iha laran.
Maibé halo duvida maka implementasaun tanba haree ba membru governu ne’ebé atu implementa ne’e balun laiha kapasidade. Ne’e duni, oinsá atu bele garante sustentabilidade programa iha kontestu implementasaun.
António hatete, ministru no vise-ministru balun agora daudaun ne’e halo servisu brillante tebes ne’e presiza mantein, ba sira ne’ebé seidauk hatudu progresu servisu 100 nian xefe governu tenke halo akompañamentu.
