Nia apela ba povu no instituisaun Estadu hotu tenke aprende husi sala, nune’e hamutuk hakotu lalais impase polítika iha rai laran.

Xanana otimista katak, kontribuisaun boot husi povu ho sosiedade tomak maka garante estabilidade ho pás iha rai laran, nune’e bele ultrapasa situasaun hotu-hotu.

“Ita bele dehan laiha difikuldade ida iha ita nia vida, ne’ebé ita bele hakat liu ‘nothing is impossible’. Joven sira tenke aprende ho komprende saida mak konstrusaun Estadu”, dehan nia, iha Sede g7+ Palásiu Governu, horisehik.

Nia dehan, esperansa boot katak sedu ka tarde povu iha nasaun ne’e sei hakotu impase polítika.

Nune’e, Xanana husu timoroan tomak tenke hamutuk hodi rekoñese sala sira durante ne’e halo ba povu ho nasaun, hodi hamutuk lori povu ho nasaun ba naroman.

Iha oportunidade ne’e, Eis-Xefe Estadu mós hakarak husu ba joven timoroan tomak tenke aprende no estuda konstituisaun RDTL, nune’e komprende saida mak konstrusaun Estadu, la’ós joven sira tuur mak ko'alia barak.

Tanba ne’e, ema hotu tenke rekoñese aan halo sala, maibé labele fiar aan dehan la komete erru ruma, tanba nu’udar umanu sempre la sees husi sala. Ne’e duni, tenke hadi'a hodi hamutuk dezenvolve povu ho nasaun.

Iha oportunidade ne’e, Prezidente Partidu CNRT ne’e mós lansa kritika makaas ba Prezidente Repúblika, Francisco Guterres Lú Olo, tanba desizaun ne’ebé foti hodi la fo pose ba membru governu hatudu hela frajilidade Estadu.

“Ne’e hatudu frajilidade iha ita nia estadu nune’e hau sei ba ko’alia ho rai sira seluk hamutuk g7+ atu evita ida ne’e,” Deklara Xanana iha Sede g7+, Palásiu Governu, horisehik.

Maski nune’e, kona-ba kandidatu membru Governu na'in tolu ne’ebé seidauk toma pose, Xanana rasik lakohi fó komentáriu, tanba Partidu CNRT iha estrutura ne’ebé desizaun tomak iha estrutura nia-liman.

Tuir nia, Xefe Estadu ho Xefe Governu mak iha kompeténsia hodi solusiona impase polítika iha rai laran, tanba Xanana rasik la envolve ona Governu.

Tanba ne’e, Xanana Gusmão rasik lakohi responde ezijénsia Partidu CNRT nian hodi ezije ba Xefe Estadu atu toma pose lalais ba kandidatu membru Governu na’in sia husi CNRT ne’ebé pendente hela.

Maski la envolve ona estrutura Governu, maibé kontinua fó korajen ba bainhira diskusaun OJE 2018 tenke ho opiniaun ne’ebé nune’e pasa no promulga atu rezolve ezijénsia Estadu nian.