Informasaun ne’ebé diáriu ne’e asesu husi Palásiu Governu, Primeiru Ministru envia ona karta ofisial hodi husu adia prosesu tomada-de-pose datoluk nian, ne’ebé tuir loloos ajenda ona ba ohin, Kinta (16/8).
Xefe Governu haruka pedidu ne’e ba Xefe Estadu tanba VIII Governu Konstitusionál hakarak rezolve uluk problema interna antes membru governu na’in tolu (3) ne’e simu pose.
Maski nune’e, informasaun seluk ne’ebé espalla iha Palásiu Governu, desizaun ne’e Primeiru Ministru foti hafoin simu karta ofisial husi bloku Aliansa Mudansa ba Progresu (AMP) hodi husu atu kanselamentu pose membru governu na’in tolu.
AMP ezije katak, bainhira atu fó pose ba membru governu na’in tolu ne’e hanesan Alfredo Pires, Samuel Marçal no Rogério Mendonça, tenke envolve mós kandidatu membru governu na’in sia (9) sira seluk ne’ebé pendente hela.
Kanselamentu pose ba membru Governu sira ho ida ne'e ba dala rua ona. Antes ne'e, Prezidente Repúblika dekreta ona atu fó pose ba kandidatu membru governu hanesan Filomeno Paixão, Xanana Gusmão no Rogério Mendonça, maibé governu husu atu pendente pose ba Xanana no Rogério. Nune'e, pose hala'o de'it ba Meno Paixão nu'udar Ministru Defeza.
Hafoin prosesu diskusaun ne'e la'o, Xanana Gusmão mós rezigna-aan husi lista kandidatu membru governu nu'udar Ministru Ministru Planeamentu no Investimentu Estratéjiku (MPIE), ne'ebé ikus mai substitui fali husi Samuel Marçal.
Nune'e, Governu hamosu lista kandidatu membru governu na'in 12 hodi aprezenta ba Prezidente Repúblika inklui lista na'in sia (9) ne'ebé antes ne'e pendente , maibé ikus mai Xefe Estadu nomeia de'it ema na'in tolu maka hanesan Alfredo Pires nu'udar Ministru Petróleu Rekursu Minerais (MPRM), Samuel Marçal ba Ministru Planeamentu no Investimentu Estratéjiku (MPIE) no Rogério de Araújo Mendonça nu'udar Vise-Ministru Peska.
Loron ba simu pose nian determina ona iha Kinta (16/8), maibé ikus mai tenke kansela fali tanba seidauk iha konkordánsia entre Governu ho Prezidénsia Repúblika.
Entretantu, Ministru Reformasaun Lejizlativa Asuntu Parlamentár (MRLAP), Fidelis Magalhães hatete, kandidatu membru Governu na'in sia ne’ebé seidauk simu pose Primeiru Ministru halo hela esforsu hodi diálogu ho Xefe Estadu atu bele simu pose dala ida.
Nia dehan, Xefe Governu nia-pozisaun sei la substitui kandidatura membru governu ne’ebé nia indijita ona atu Xefe Estadu nomeia no fó pose.
Nune’e, Ministru Estadu Presedénsia Konsellu Ministru, Hermenegildo 'Agio' Pereira hatete, ba kandidatura membru governu ne’ebé seidauk simu pose ne’e kompeténsia Xefe Estadu no Xefe Governu nian atu bele rezolve.
