Iha plenaria PN, bankada Partidu Demokratiku, Fretilin no Khunto, hato’o sira-nia pozisaun relasiona ho akuzasaun ba Amu Belo ne’ebé públika husi jornal Olandes ida iha semana kotuk.

Prezidente Bankada PD, António da Conceicão 'Kalohan' konsidera notisia ne’ebé públika husi jornal Olandes ameasa tebes sarani Katoliku sira iha Timor-Leste, kona-ba nia fiar no mós kona-ba unidade nu’udar Timor-oan,.

Situasaun ne’e, nia dehan, loke espasu atu Timor-oan barak liu ne'ebé ho kapasidade no koñesimentu ne'ebé ladun maka’as no la kritiku, monu iha manobra oportunu hodi husik nia fiar.

Tuir Kalohan, notisia ameasa ida ne'e sei bele hetan duni susesu tanba ohin loron osan bele halakon fiar no osan mós bele hola justisa.

“Deklarasaun bankada PD nian ne'e laos imajináriu sensasionál, faktus ne'ebé Timor-Leste hasoru dezde inisiu ukun an mak prova lia loos ida ne'e. Iha grupu sektárius ne'ebé lori naran organizasaun umanitária no uza razaun tulun ema kiak no kbiit laek hodi hafalun sira-nia interese hodi mós hasees ona ema barak husi fiar Katolika."

"Notisia ne'ebé jornal Olandeza ne'e públika hodi mós hetan divulgasaun husi Ajensia Luza hakanek povu katoliku Timor-Leste no mós fó basa ba igreja lokál Timor-Leste nian ho liman subar ida."

“Maske nune'e, notisia semana kotuk ne'ebé mak jornál Olandez ne'e haklaken mai ho intensaun harahun, hamoos no halakon tomak obra monumentál ne'ebé igreja no povu Timor harii mesak iha tinan 24 laran.”

"Bispu Eméritu Dili ne'ebé ohin loron hasees an rasik hodi ba hela iha rai Portugál tanis mesak iha laran no hedi an neneik iha hela kalváriu mundu nian iha Portugál," dehan Kalohan iha plenaria PN, Segunda (03/10).

Tanba ne'e, Bankada PD husu atu Ministériu Negosiu Estranjeiru no Kooperasaun (MNEK) ko'alia ho reprezentante Nunsiatura iha TL atu halao knaar diplomasia Santa Se nian ho loloos hodi mós kumpriende kultura povu TL nian.

Alende n'e, nia husu mós ba MNEK atu kolia ho Emabaixada Olanda atu husu ba jornál ne'ebé habelar informasaun ne'e respeita kultuta TL nian hodi labele fó menta dezagreasaun ba sosiedade Timor nian lori naran direitus umanus no justisa.

PD, Kalohan hatutan, hato'o solidariedade ba Amu Belo no louva ninia umildade obedensia atu simu impozisaun obrigatória hotu ne'ebé mak Vatiku hatodan ona ba nia.

Deputada Bankada Khunto, husu ba jornalista balun ne'ebé haklaken informasaun ba kazu Amu Belo nian atu hatudu dadus primaria ne'ebé nia iha, laos interpreta de'it artigu ida ne'ebé jornalista Olandesa púlika.

Tuir nia, se jornalista ninia informasaun primaria husi vitima sira iha entaun jornalista refere halo duni ninia funsaun ho profesional.

"Se laiha informasaun primaria mak jornalista refere iha intetese atu hatun de'it ita Timor-oan," dehan nia.

Prezidente Parlamentu Nasionál, Aniceto Longuinhos Guterres hatete, nu’udar Timor-oan presiza atu hatene motive husi ema ne’ebé fó sai informasaun refere.

"Ida ne'e issu kleur nian mais derrepente ema kaer fila-fali depois halo sensasi foun ida. Ha'u hanoin ita presiza hatene de'it ema-nia motivu ne'e saida, nu’udar sarani Timor-oan ita presiza hatene di'ak ba ida ne'e," dehan nia.