Tuir Manajer Programa Empoderamentu Labarik Feto, iha Plan Internasional, Eta Mota, hatete, kada tinan Plan Internasional sempre hala'o atividade hodi fó oportunidade ba labarik feto sira foti posizaun, hanesan, Sekretariua Estadu, Ministru, Prezidente Repúblika, Diretór no kargu seluk tan.
“Plan fó oportunidade ba labarik feto sira atu aprende oinsa? bele sai lideransa ne'ebé di'ak iha futuru ba iha pozisaun ne'ebe sira foti, atu dezenvolve sira nia aan no hanoin ne'ebé kritiku fiar-aan hodi bele la'o ba oin," dehan nia iha sala konferensia SEKOMS, Palasiu Governu, tersa ne’e (04/10).
Nia dehan, tuir lolos Plan nia tarjetu hili labarik sira atu lidera pozisaun mak hanesan iha Munisipiu Aileu ho Ainaro de’it.
Maibé, iha selebrasaun ba loron mundial labarik feto tinan ne'e, plan mós fó oportunidade ba labarik feto sira husi Munisipiu Baukau, Kovalima, Dili no mós RAEOA.
Nia hatete, Plan Internasional kontinua hala'o servisu, hodi promove direitu no fó protesaun ba labarik sira hodi luta ba Igualdade jeneru.
"Tan ne'e ami kontinua empodera sira, tanba kada tinan ami selebra loron internasional labarik ne'ebé monu iha loron 11 Outobru," nia dehan.
Nia akresenta, iha tinan ne'e, Plan Internasional fó ona oportunidade ba labarik feto hamutuk na’in 58 asume pozisaun iha area oioin, hodi hatudu ba mundu katak labarik feto sira mós bele.
Manajer ba programa ne’e hatutan, aleinde promove sira, Plan Internasional mós asegura labarik sira ne’ebé sai vitima no fó hanoin ba sira atu koalia sai bainhira hetan kazu ruma.
Entrentantu, labarik feto ho naran Sefiana Soi da Grasa ho idade (13), husi Munisipiu aileu, hetan mós oportunidade husi Plan International hodi asume kargu hanesan Sekretaria Estadu Komunikasaun Sosial (SEKOMS), iha loron 04 outobru tinan ne'e, durante oras ida nia laran.
"Ha'u sente Kontente bele hetan oportunidade ne'ebé ha'u la espera bele lidera posizaun nuudar Sekretariu Estadu Komunikasaun Sosial, ne'e orgullo tebes bele sai mós lideransa di'ak iha futuru," dehan Sefiana.
