Tuir sirkular ne’ebé munisipiu Dili hasai, orariu ba soe foer mak hahú husi tuku 4:30 madrugada to’o 7:00 dader, no bainhira liu ona oras ne’e labele soe ona foer hodi fó oportunidade ba parte saneamentu atu raut.
Maibé, tuir Xefe Departamentu Saneamentu Munisipiu Dili, Domingos dos Santos Soriano, realidade ne’ebé komunidade barak mak ulun toos hodi soe foer la tuir orariu ne’ebé deside ona.
“Realidade ita timor-oan ulun-fatuk toos duni, liu-liu mak loza no restaurante, tanba sira-nia loza no restaurante loke tuku 7 ou 8 entaun ita raut liu tiha foer sira foin soe. Ne’e problema hotu, katak orden ou sirkular ne'ebé governu fo sai liu husi munisipiu Dili ema nunka fiar liu,” dehan Xefe Departamentu ne’e iha nia knar fatin, Matadoru, Kinta (22/10).
Nia dehan, durante ne’e autoridade sira uza meius oioin hodi sensibiliza komunidade sira atu soe foer iha fatin no kumpre orariu soe foer nian, maibé laiha rezultadu.
“Bainhira komunidade sira laiha konsensia entaun impaktu mak iha fatin-fatin kontinua iha lixu no iha parte dader ami servisu kona-ba lixu ne'e ami rende no foti neneik tanba servisu ne'ebe ami servisu manual, tenke aruma tau iha karon hasa’e ba karreta,” dehan nia.
Kona-ba preokupasaun balun ba foer ne’ebé butuk iha fatin foer balun maibé parte saneamentu la raut, nia dehan, aleinde tanba kestaun ne’ebé temi ona, tanba mós dala-ruma karreta ne’ebé uza ba tula foer falla.
Aleinde ne’e, nia hatutan, komunidade balun mós la soe foer iha fatin ne’ebé governu prepara ona, maibé soe arbiru de’it.
Iha fatin ketak, estudante ida husi Unital, Natalisio de Jesus preokupa mós konsensia komunidade sira iha kapital Dili hodi soe foer iha foer fatin.
“Dala-barak ha’u haree kompaña balun ba fakar lixu arbiru iha fatin publiku hanesan mota laran, estrada ninin,” dehan nia.
Aleinde ne’e, tuir nia, joven barak, liu-liu estudante sira maioria mak la ambitua an hodi soe foer iha fatin soe foer.
“Iha eskola sira, ema nunka atu soe foer iha foer fatin, barak kumu de’it plastiku ka buat seluk ne’ebé sira uza ona depois soe tuun ba de’it,” dehan nia.
