Maske atividade ne’ebé koñesidu ho termu camping ne’e nu’udar direitu husi kada ema, maibé mosu preokupasaun husi parte Polisia Nasionál Timor-Leste, tanba sira idenfitika katak iha joven feto ho mane balun ne’ebé aproveita hodi ‘toba hamutuk’.

Relasiona ho ida ne’e, Komandante Jeral PNTL Komisáriu Faustino da Costa orienta ona Komandu PNTL Munisipiu Dili atu halo atuasaun ba joven sira ne’ebé gosta ba camping iha tasi-ibun.

“Ohin loron iha mak atividades fim de semana ninia ne’e mesak joven de’it mak sempre halo camping-camping iha tasi-ibun.”

“Klaru katak ne’e situasaun ne’ebé direitu pesoal ida maibé iha camping balun ne’ebé PNTL nota katak se joven sira ne’e depois la’o hamutuk na’in rua, na’in tolu, feto ida mane rua, mane ida ho feto rua toba hamutuk iha lona kiik-oan ida nia laran mós ne’e ba Komandu PNTL preokupasaun, ne’ebé PNTL tenke haree,” dehan Faustino hafoin hasoru-malu ho Prezidente Repúblika Francisco Guterres Lú Olo iha palasiu prezidensial, Bairo-pite, Kinta (22/10).

Entretantu, tuir observasaun jornalista jornal INDEPENDENTE, iha kada Domingu dader, grupu joven balun kompleta ho lona kiik sa’e husi area Dolok-oan hodi tuun ba area jardin iha Kristu Rei no uza sira-nia transporte hodi fila ba uma.

Tuir komunidade balun ne’ebé kada Domingu ba halai iha area Kristu Rei, nia sempre hasoru grupu joven balun lori tenda kiik.

“Kuandu Domingu dader mak ha'u halai ba Kristu Rei joven barak mak sempre hasoru ha'u husi Kristu Rei nia kotuk kompletu ho tenda. Kuaze Domingu-Domingu sempre hanesan ne'e, signifika katak Sabadu-sabadu sira sempre toba iha ne’ebá,” dehan nia,