Ema ho Defisiénsia, Lario Coreiro de Jesus Ximenes Mendonsa ho idade 25 ho labarik nain rua seluk simu bensaun, bainhira Sua Santidade Papa Francisco sai ona husi Nusiantura Apostoliku Motael, ba vizita ALMA Pantai Kelapa.

“Ami senti kontente tebes. Tamba ida ne'e hanesan milagre ida mai ami nia  alin ne'e, no senti alegria, tanba nia hetan bensaun husi Amu Papa Francisco", Haktuir Reprezenta Família husi Ema ho Defisiénsia Luciano Pereira de Jesus, hafoin simu bensaun, iha Nusiantura, Motael,Tersa (10/08).

Reprezentante maun husi Defisiénsia ne'e haktuir, nia alin ne'e hetan moras ne'e hahú kedas nia moris mai, mak to'o ohin loron.

“Nia  moras ne'e durante nia moris mai mosu moras ida, hodi ataka nia sai tiha defisiénsia. Entaun ohin nia simu bensaun senti kontente, no espera bele rekopera nia moras ne'e, diak, hanesan ho ami,” Nia espera.

Enkuantu, nia ho nia alin Ema ho Defisiensia ne'e hein Amu Papa Francisco iha portaun Nusiantura hahu kedas husi tuku 7:00 dadersan.

“Ami hein kedas iha jam tuku 7:00 dadersan ne'e, entaun ohin Amu Papa Francisco fo bensaun,” Nia haktuir.

Iha fatin hanesan, Inan husi Labarik Adelina de Jesus Ramos hatete, bainhra hare Papa Francisco sai mai husi Portaun Nusiantura nian nia hare bolu kedas hodi fó bensaun.

“Ha'u senti kontente hetan nia (Papa Francisco), ha'u hamri'ik hela ho ha'u nia oan, nia bolu ha'u ho ha'u nia oan, hodi fo bensaun. Ha'u kontente los, ami ka'er nia  liman hodi bensa, ha'u senti kontente los,” Nia dehan.

Nia informa, bainhira kaer Papa Francisco nia  liman senti kontente no Senti hanesan Milagre no naroman.