“Ema moras ne’ebé ba konsulta ka baixa iha ospitál, tenke halo teste PCR atu bele determina se infetadu ka la’e, hodi nune’e bele prevene hada’et tutan virus corona ba ema seluk iha ospitál laran,”dehan Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo liuhusi karta komunikadu ne’e, ne’ebé Online Independente asesu, segunda (3/5).
Rui esplika katak, bainhira rejultadu sai mak pasiente ne’e positivu Covid-19, tratamanetu ba pasiente sei hala’o iha fatin izolamentu Vera Crus ba moras ne’ebé nia enfrenta, inklui virus corona, husi mediku sira tuir protokolu.
“Bainhira pozitivu, tratamentu ba ninia moras sei hala’o iha fatin izolamentuiha Vera Cruz, husi mediku sira no tuir protokolu tratamentu ba ninia moras, ne’ebé uza iha HNGV,”dehan Dr. Rui.
Dr. Rui klarifika assuntu ne’e hodi responde preokupasaun públiku liliu pasiente sira ne’ebé kestiona kona-ba servisu mediku sira iha ospitál.
Pasiente balun preokupa katak bainhira hakarak ba konsulta sira nia moras ruma iha ospitál, mediku sira halo uluk teste PCR no hein rejultadu sai mak foin halo tratamentu moras.
Hanesan mós akontese ba familia matebian Fernando do Rego, ne’ebé ba halo tratamentu iha ospitál tanba hetan asidente transitu.
Tuir aman kiik matebian, Gregorio da Silva hatete, bainhira matebian to’o ospitál, mediku sira so halo de’it mak hasai R-X no CT-Scan.
Matebian tama ospitál iha kalan 27 fulan-Abril, no toba iha sala observasaun durante oras neen (6) nia laran, medikus sira haruka fila ba uma.
To’o uma, iha loron 29 fulan-Abril, matebian evakua hikás mai ospitál tanba hahú moras grave. To’o ospitál mediku sira seidauk bele halo tratamentu lalais, husu ba familia matebian atu halo uluk teste PCR hodi hatene nia rejultadu mak foin bele fó tratamentu.
Rejultadu teste hatudu pasiente positivu Covid-19, nune’e evakua kedas ba izolamentu Vera Crus no to’o ikus pasiente hakotu iis, hafoin halo tratamentu ba nia moras ne’e.
Entretantu kona-ba moras Covid-19 ne’ebé kada loron aumenta bebeik, Governu liuhusi Ministériu Saúde mós kontinua hala’o vasina ba abitante sira ne’ebé konsidera liña oin luta kombate Covid-19.
Husi AstraZeneca rihun 24 ba faze dahulukk nian, kuaze abitante na’in rihun 28.576 mak hetan ona vasina, inklui funsionáriu setór saúde hamutuk 8.220.
Jornalista: Saturnina da Costa
Editor: Jose Sarito Amaral
