Prezidente Bankada PLP, Maria Angelina Sarmento hatete, Governu hanoin ona atu halo alterasaun ba impostu asukarada, maibé presiza hare mós ba taxa sigaru nian.

“Sigaru ilegal tama barak tebes iha Timor-Leste, ita la kontrola ida ne’e, bainhira audiensia ami debate kestaun ida ne’e,  Vise Ministru Finansas hateten, prefere atu halo kontrolu uluk ba ita nia fronteira, ida ne’e ami duvidas boot, tanba fulan 6 nia laran ita la konsege halo kontrolu ba ida ne’e, agora sigaru ne’ebé tama ilegal kuaze sira la selu reseitas ba estadu, ida ne’ebe legal selu tiha reseitas, maibé ema la sosa tanba taxa ne’ebé ita implementa ne’e karun liu,” dehan Deputada Maria Angelina, bainhira hala’o diskusaun ba proposta Orsamentu Retifikativu 2023 iha Parlamentu Nasionál, (22/8).

Nia haktuir, governu dasia hakarak hatun taxa asukar, entaun hanoin hatun mós taxa impostu sigaru nian ne’ebé sa’e hodi hamosu sigaru ilegal tama iha rai laran.

“Ita tenke tetu ba adekuadu, se hatun taxa impostu asukar, sebele tabaku nian mós tau iha konsiderasaun, tanba sigaru ilegal agora fa’an malorek loos, la selu tan taxa, depois ema prefere ba sosa iha sira,” tenik nia.

Entertantu Deputadu Bankada KHUNTO, Luis Roberto  da Silva hateten, nia parte aseita ho desizaun Governu hodi halo alterasaun ba taxa impostu asukarada, maibé problema mak la inklui taxa tabaku nian.

“Ha’u nia pergunta mak governu la inklui taxa tabaku nian,  tanba tabaku  uluk ne’e, kada kilo-grama $19, depois hasa’e ba $50 kada kilo-grama no to’o $100 kada kilo-grama,”dehan Deputadu Luis.

Nia haktuir, tanba sa mak governu la hatun mos taxa ida, tanba durante taxa sa’e entaun hatama sigaru ilegal barak loos iha Timor-Leste.

“Tanba ninia reseita la tama estadu,  sira ne’ebé mak halo ilegal sira ne’e, ninia vantajen la fo ba timor, maibé fo fali ba nasaun seluk ninian mak hetan lukru fali, ita timor mak hela ho zero, depois impaktu ba ita nia setor privadu sira ne’ebé mak iha Timor,” nia kestiona.