"Ita sei halo formasaun no kria kondisaun hodi hare regra atuasaun sira, nune’e membru PNTL sira kumpri regra sira ne'e hotu, tanba ne'e iha ona diskusaun no ami sei foti medidas ba membru PNTL sira, sei suspende sira nia envolvimentu iha  grupu arte marsiais, nune’e sira bele halo atuasaun ho neutru," informa Francisco Guterres ba Jornalista sira hafoin Partisipa iha debate Orsamentu Reatifikativu iha Parlamentu Nasional, (22/08).

Nia informa, Governu suspende membru PNTL sira tama arte marsiais la’os dehan atu hasai sira husi instituisaun PNTL, maibé suspende deit sira bainhira halo misaun PNTL labele pratika arte marsiais, nune’e atu halo atuasaun ba kazu ruma tenke neutru.

"Ita suspende sira la’os atu hasai sira husi PNTL, maibe ita suspende deit sira bainhira halo misaun hanesan PNTL labele pratika arte marsiais, para halo atuasaun tenke neutru, tanba komunidade hakarak moris hakmatek.

Nia afirma, membru PNTL sira sei lá entrega sira nia atributu arte marsiais, maibe sira só suspende deit durante sira sei ativu iha PNTL, bainhira remata ona misaun iha PNTL bele ba tama fali iha arte marsiais ida ne'e mak importante, nune’e sira bele halo atuasaun ruma ba kazu konfrontu tenke neutru.

"Se membru PNTL ne'e envolve iha grupu arte marsiais ruma mak, bainhira akontese konfrontu entre nia grupu ne'e ho grupu seluk nia ba ne'e  sei fo sala mak grupu seluk ne'e ida nia grupu ne'e sala mos nafatin defende los ida ne'e mak ita atu suspende sira nia atividade pratika ne'e atu ba oin halo atusaun ruma ho neutru para sira implementa lei ho ordem," tenik nia.