Vise Ministru Finansas, Helder Lopes informa, governu dasia sei kontinua politika subsidiu transporte ne’ebé governu daualu hasai ona.

“Ita nafatin kontinua aplika ida ne'e tanba nia benefisiu iha, di'ak, ita bele kontrola," informa Helder hafoin partisipa debate Orsamentu Retifikativu iha Parlamentu Nasionál, Kuarta (23/08).

Nia hatutan, Ministeriu Finansas koloka karreta sufisiente iha kada instituisaun nu'udar karreta operasional hodi bele suporta sira-nia serbisu operasional.

Aleinde ne'e, nia dehan, iha patrimoniu estadu iha karreta ne'ebé bainhira iha atividade balun no karreta ne’ebé tau iha instituisaun públika la sufisiente, sira bele halo pedidu ba Ministériu Finansas hodi bele suporta sira.

Molok ne'e, iha 20 Setembru 2021, Governu liu husi reuniaun Konsellu Ministru (KM) estra-ordinária, aprova projetu Dekretu Lei ne'ebé aprezenta husi Ministru Finansas, Rui Augusto Gomes, kona-ba kria subsídiu mensal transporte ba servidór estadu sira.

Tuir Ministru Prezidénsia Konsellu Ministru, Fidelis Manuel Leite Magalhães, subsídiu ne'e ba titulár sira iha kargu diresaun no xefia, inklui ba funsionáriu sira administrasaun públika, atu substitui atribuisaun veíkulu estadu.

"Kriasaun subsídiu ne'e atu kompensa kustu regulár husi benefisiáriu sira, relasiona ho transporte no mós atu hamenus despeza husi atribuisaun veíkulu estadu no promove rasionalizasaun ba parke automóvel públiku," informa Fidelis iha altura ne’ebá.

Montante mensál subsídiu nian ho valor $25 ba funsionáriu públiku sira, $50 ba Xefe sesaun, $75 ba xefe departamentu, $100 ba diretór nasionál sira no $150 ba diretór jerál sira.

"Kalkula katak medida ne'e permite atu alkansa poupansa ida liu rihun $700, kona-ba kustu atuál akizasaun no manutensaun ba veíkulu no kombustível nian," dehan Fidelis.

Projetu Dekretu Lei ne'e hetan ona promulgasaun husi Prezidente Repúblika no hahú implementa iha fulan Janeiru 2022.