Ministru Administrasaun Estatal, Tomás Cabral hatete, programa Uma Naroman ba Povu (UNP) ne’e programa ne’ebé di’ak, maibé nia parte suspende hodi hein auditoria husi Kamara Kontas.
Tomas dehan, hafoin Membru Governu dasia simu pose, Kamaras Kontas informa kedas kona-ba prosesu konstrusaun UNP iha hela auditoria.
"Ita suspende projetu Uma Naroman ba Povu ho razaun tanba ita simu informasaun husi Kamara Kontas katak sira rekoila ona informasaun kona-ba fornesimentu sasan no desizaun atribui fatin, no prosesu ba auditória ne'e la'o hela," informa Ministru Tomas, iha Parlamentu Nasionál, Kuarta (23/08), relasiona ho preokupasaun husi deputadu sira kona-ba implementasaun UNP.
Tan ne’e, nia dehan, bainhira prosesu auditória la'o hela, MAE sei la autoriza projetu ne'e la'o tan.
“Hakarak ka lakohi tenke suspende lai to’o tinan ne'e remata, tanba mata-dalan konstrusaun Uma Naroman ba Povu hatete, fatin ida la asesu, labele asesu, no labele muda ba fatin seluk tenke kontinua iha fatin.”
"Ha'u fó ona orientasaun ba administradór postu no munisipiu sira atu koordena ho suku sira, hodi fornese relatóriu ezekusaun, kuandu Kamara Kontas nia ema ba halo auditória ita tenke fornese relatóriu, tanba orsamentu ne'e transferensia públiku," dehan nia.
Projetu refere, nia hatutan, governu sentrál fornese ona material balun, maibé Kamara Kontas sei buka nafatin halo auditória, tanba implementasaun iha kraik, liu-liu ba fator fornesimentu material no desizaun ba atribuisaun, presiza auditória.
"Atu dehan buat balun la'o la loos, ida ne'e auditória mak hatene, tanba ami foin mak tama halo servisu fulan ida, maibé antes ne'e auditória la'o tiha ona, signifika antes ami tama auditória kontinua, tanba ne'e se ami la kumpre regra ne'ebé iha, ami mós bele kona, tanba ne'e mak ita suspende lai durante fukan 4 ne'e, ita fornese hotu tiha relatóriu ezekusaun ba fatin auditória, no bele mós ami rasik hatun auditória ba prosesu ida ne'e," nia klarifika.
Entretantu, deputadu bankada Fretilin, Antonio Bianco, kontinua defende programa UNP ne’ebé governu daualu prevee ona ninia orsamentu iha Orsamentu Jeral Estadu (OJE) 2023.
“Ami mai atu tau orsamentu ba programa ida ne’e hodi halo uma ne’ebé dignu ba povu sira. Lori tempu naruk mós osan ne’ebé tau ona labele hasai, tanba ne’e povu nia direitu ona entaun tenke fó duni ba sira," katak nia.
