Ministru Defeza, Donaciano do Rosário da Costa Gomes ‘Pedro Klamar Fuik’ hateten, Autoridade Maritima Nasionál (ANM) sai hanesan prioridade nasionál IX Governu nian, tanba Timor-Leste iha ona definisaun fronteira marítima, Governu no Estadu presiza ezerse autoridade ne’ebé iha espasu juridisaun rasik.
“Agora ne’e tama iha Governu nian programa, atu reforsa autoridade ida ne’e mak tinan ne’e ita hahú lejizlasaun, tanba lejizlasaun prontu hotu ona no ita sei tau meuis, nune’e apartir tinan oin ita komesa tau iha prátika no asaun ne’ebé nesesariu para bele fortifika ita nian ezersisiu Autoridade Nasionál Marítima oinsá atu halo kontrolu ba iha ita-nian tasi,” dehan nia, iha Parlamentu Nasionál, horisehik.
Tanba ne’e, nono Governu deskreve iha nian programa ba tinan lima sei reforsa Autoridade Nasionál Marítima atu salva guarda ba rikeza no rekursu tasi Timor-Leste.
“Tasi presiza autoridade ida ita hanaran Autoridade Nasionál Maritima ne’ebé bele ezerje autoridade Estadu nian iha ita nian tasi, atu bele halo salva guarda ba rikeza no rekursu ne’ebé mak ita iha liu liu iha tasi,” afirma nia.
Nia dehan, atu fortifika autorodade ida ne’e ministeriu hirak ne’ebé hola parte hanesan Ministeriu Agrikultura, Ministeriu Interior liuhusi Polísia Nasionál Timor-Leste Ministeriu Transporte Komunikasaun no Ministeriu Finansas liuhusi Auridade Aduaneiru Alfándega (AAA) no Ministeriu Defeza ne’ebé sai hanesan kordenadór ba autoridade ida ne’e sei ezekuta programa nono Governu nian hodi reforsa Autoridade Nasionál Marítima atu nune’e bele halo kontrolu iha tasi Timor bele la’o ho di’ak.
“Estadu Timor-Leste bele ezekuta nian autoridade iha tasi ho forma ida efikasia no efisiente, signifika katak ita tenke hatudu ita iha autoridade iha tasi,” informa nia.
Alende kona-ba meus atu dezenvolve Autoridade Nasionál Marítima (ANM), hodi kontrola tasi Timor, Governu sei tau iha Orsamentu Jerál Estadu (OJE) 2024.
“Ita sei prevé osan ba ita-nia forsa armada komponente tolu ne’e inklui ba iha Autoridade Nasionál Marítima ne’e rasik, oinsá atu dezenvolve, agora ita deskute orsamentu retifikativu, orsamentu tinan oin ita sei haree,” hakotu nia.
