Sekretáriu Estadu Formasaun Profisional no Empregu Rogério Aroujo Mendoça hatete, IX governu liu husi SEFOPE kria tan istoria foun iha rai laran liuliu iha programa mobilidade laboral ne'ebé asina ona husi parte SEFOPE no Governu Nova Zelandia nian, liu-liu iha programa Reoganizad Seasonal Employer (RSE).
"Prosesu sira ne'e hotu ita tenki iha preparasaun ne'ebé di'ak, ohin ita asina ona MoU, ohin ami halo ona diskusaun ho ekipa tékniku sira hotu, loron 8 Setembru hahú ona loke rekrutamentu ba ita nia jovem sira ne'ebé mak atu ba servisu iha Nova Zelandia," dehan nia ba Jornalista sira hafoin remata asina MoU iha Salaun SEFOPE kaikoli, Kinta (21/08).
Governante ne’e esplika, kona-bá númeru rekrutamentu SEFOPE seidauk bele pronunsia sai, maibé fiar katak empregadór sira ne'ebé presiza traballadór sira atu ba servisu sei mai iha Timor-Leste hafoin bele hatene númeru hira mak sira presiza no mós kuantidade hira.
Nia hatutan, iha rekrutamentu faze dahuluk ne’e sei liu husi sistema online.
Iha fatin hanesan, Embaixadora Nova Zelandia iha Timor-Leste Helen Tunnah hatete, momentu asina nota entendimentu ne'e pozitivu tebes ba relasaun entre Timor-Leste ho Nova Zelandia iha programa mobilidade laboral.
"Ohin, hanesan loron ne'ebé positivu tebes ba relasaun entre Timor-Leste no Nova Zelandia. Asinatura akordu entre ajensia ne'e hanesan pasu tuir mai ba programa foun mobilidade laboral entre ita-nia nasaun sira," dehan Embaixadora.
Nia dehan, Governu Nova Zelandia konkorda ona iha tinan kotuk inklui Timor-Leste iha sira-nia programa mobilidade laboral. Sira halo ida-ne'e hodi hatán ba pedidu husi Governu Timor-Leste, ne'ebé sei apoia nasaun rua.
"Ida ne'e sei ajuda empregadór Nova Zelandia sira atu hetan traballadór di'ak sira husi ne'e no sei tulun atu suporta rendimentu ba povu Timor-Leste no desenvolvimentu abilidade serbisu nian. Ida ne'e parte ida husi ita-nia kompromisu jerál ba dezenvolvimentu nasaun ida-ne'e nian no ba foin-sa'e sira," katak embaixador.
Enkuantu, tuir akordu ne'ebé iha, kooperasaun entre Timor-Leste ho Nova Zelandia, iha rekrutamentu faze dahuluk ne’e, sei presiza Timoroan sira ne’ebé sei ba servisu uluk iha area hortikultura no Fictingkutura no kriteria ne'ebé jovem sira presiza mak tenki hatene lin inglés.
