Bainhira rona novidade triste kona ba Sekretária Jerál OPMT no Eis Ministra Solidariedade Sosial no Inkluzaun (MSSI) Florentina Smith hakotu ona iss, Sekretariu Jerál Partidu FRETILIN Mari Alkatiri to'o kedan iha sala Mortuariu HNGV, hodi haree direita no presta mós omenajen ba saudoza.
Sekretáriu Jerál Mari Alkatiri ho lideransa estrutura FRETILIN sente hakfodak tanba saudosa ho atakasaun derepente lori ba ospital maibe la hetan salvasaun, oras ne’e dadaun saudosa nia isin mate iha ona nia rezidensia.
Tuir Komunikadu ne’ebé Online ne’e sita, iha pajina Facebook militante Juventude FRETILIN hatete, desde nia kriasaun, OPMT hamrik nu’udar fuan ida mós ba FRETILIN nia luta hodi hakbit feto sira, defende justisa, no garante igualdade ba Timor oan tomak.
“Ohin, ita hotu lutu ba Adjunta Sekretáriu Jerál FRETILIN no Sekretária Jerál OPMT, Camarada Florentina Smith ne’ebé fila hikas ona ba nai nia kadunan santu, ita hanoin hikas ninia komitmento a’as hotu-hotu atu luta ba objetivo boot OPMT nian. Nia representa firmera luta libertasaun husi feto sira, hodi prova katak luta ba independénsia no dignidade sei la kompletu bainhira laiha lideransa no forsa husi Timoroan feto sira. Klaro que Ninia eransa sei inspira nafatin ita hotu, liu-liu jerasaun foun sira atu kontinua luta ba Timor-Leste ida ne’ebé justu, inkluzivu, no soberanu,”.
Biografia Saudoza Florentina Smith
Saudoza Florentina da Conceicao Pereira Martins Smith moris iha 9 Setembru 1958, nu'udar polítiku Timor-Leste nian, no membru partidu polítiku FRETILIN.
Entre Setembru 2017 no Juñu 2018, nia sai Ministra Solidariedade Sosial iha Governu Konstitusional da-VII Timor-Leste nian ne'ebé lidera husi Primeiru Ministru Mari Alkatiri.
Antes ne'e, entre 2012 no 2017, nia sai membru Parlamentu Nasional Timor-Leste.
Moris sedu no karreira
Martins Smith iha lisensiatura iha área Ekonomia no Jestaun. Antes hahú nia karreira polítika, nia mak Inspetora Jeral Ministeriu Turizmu, Komersiu no Industria. Nia mós nu'udar Sekretaria Jeral Organizasaun Popular Mulheres Timorense OPMT, divizaun feto Fretilin nian.
Karreira polítika
Iha eleisaun parlamentár timor-Leste 2012 nian, Martins Smith hetan eleisaun ba Parlamentu Nasional hahú husi loron 12 iha lista FRETILIN nian.
Iha Parlamentu Nasional, nia sai membru Komisaun Finansas Publikas (Komisaun C).
Iha tinan 2017, Martins Smith hetan fali eleisaun ba Parlamentu Nasional, hahú kedas husi fatin 12 iha lista FRETILIN.
Maibe, iha loron 15 fulan-setembru tinan 2017 nia hetan pose nu'udar Ministru Solidariedade Sosial iha Governu Konstitusional VII, tanba ne'e tenke husik hela nia kadeira tuir Konstituisaun.
Nia sai husi eskritóriu ne'e iha loron 22 fulan-junu tinan 2018, hafoin Governu Konstitusional VIII harii.
