Xefe Seksaun Relasaun Externa no Komunikasaun Nelso Nunes de Orleans hatete, dezastre naturais ne’ebé akontese ho tipo oioin, estraga ona komunidade nia uma, tanba ne’e  Sekretaria Estadu Protesaun Sivil (SEPS) liu husi Autoriedade Protesaun Sivil (APS) fó ona apoiu rekoperasaun ba vitima sira iha munisipiu tolu ne’e.

“Durante ne’e halo ona rekoperasaun ba iha munisipiu Ermera, Ainaro no Lautem. Munisipiu tolu ne’e mak halo ona rekoperasaun ba vitima sira, maibé munisipiu seluk seidauk,”dehan nia liu husi konferensia imprensa iha salaun APC, Kaikoli, Dili, (21/05/24).

Nia hatutan, Autoridade Protesaun sivil apoiu uluk rekoperasaun ba Munisipiu tolu ne’e, tanba munisipiu tolu mak rejistu dadus aas liu. 

Entretantu, apoiu rekoperasaun ne’e bazeia ba dekretu lei nu.7/2021 no despaxu no Ref: 282/SEPC/MI/X/2021, vitima dezestre naturais iha direitu atu apoiu rekoperasaun hanesan material kontrusaun, osan ba mau de obra no kustu transporte tuir nia kategori.

Nune’e, vítima sira ne’ebé tama ba kategori sira hanesan aat total sei hetan osan dolar amerikanu $1.000, ho material sira hanesan, kalen, prafuju, martelu, metru, besik kotak, besi beton, arame, balde kik, kanuru kiik ho boot no semente.

Aliende, ba katergoria aat naton hetan osan $750.00 ho material sira hanesan, kalen, prafuju, martelu, metru ho besik kotak no aat kaman hetan osan $600 ho material mak kalen, prafuju, martelu ho metro.

Enkuantu, vitima dezastre naturais husi munisipiu tolu ne’ebé APC fó ona apoiu rekoperasaun hamutuk atus hitu resin.