DILI:Uma kain vitima inundasaun hamutuk 1,760 iha Lagoa Tasi Tolu, sabdu ohin (17/4) simu ona aihan bazika husi Governu liuhusi Sekretaria Estadu Protesaun Sivil (SEPS).

Sekretariu Estadu Protesaun Sivil (SEPS), Joaquim Gusmao hateten, seremonia distribuisaun  simbolikamente ne’e bele realiza liuhusi servisu hamutuk ho Ministériu Administrasaun Estatal (MAE) ba dadus vitima dezastre hirak ne’ebé rekoilla iha terrenu.

Nia mós apela ba vitima inundasaun sira ne’ebé seidauk alista naran, hakbesik an ba autoridade komunitária sira atu halo verifikasaun hodi hetan apoiu aihan bazika.

"Governu rekoñese katak aihan bazika hirak ne’e laos atu taka buat hotu-hotu, maibé asistensia umanitaria ida ne’e pelumenus bele auguenta loron balu, depois neneik mak Ita bele rekopera ita nia ekonomia filafali,"dehan Joaquim.

SEPS mós hato’o agredesementu ba ajensia internasional sira  no organizasaun naun-Govermental sira nia apoiu aihan bazika ba vitima inundasaun ne’ebé akontese iha loron 4 fulan-Abril 2021.

Iha fatin hanesan, Xefe Estadu Maior Falintil-Forsa Defeza Timor-Leste (F-FDTL), Brigadeiru Jenerál Calisto Santos Coliati mós husu deskulpa ba komunidade afeitadu iha Lagoa Tasi Tolu tanba intervensaun F-FDTL nian hodi komunidade ne’e tarde.

"Prezensa F-FDTL tarde tanba inundasaun iha 4 Abril mós hakotu ponte ida iha Hera antaun bainhira ha’u haruka ha’u nia membru F-FDTL sira husi Metinaro mai iha Dili atu atende imi ne’ebé prisija tulun susar oituan,"dehan Coliati.

Maski nune’e membru FFDTL hamutuk 261 konsege prezensa iha Tasi Tolu iha loron 7-17 fulan-Abril  hodi hala’o intervensaun dahuluik hodi dada tenda, no tein loron-loron hodi fó han ba vitima inudasaun

Coliati apela ba komunidade Lagoa Tasi Tolu atu mantein hametin paz no unidade tanba prezensa durante semana rua de’it no termina ona sabdu ohin.

Jornalista: Camilio de Sousa

Editor: Jose Sarito Amaral