Liuhusi komunikadu husi Gabinete Presidente Repúblika, ne’ebé Online Independente asesu sabdu ohin, Xefe Suku Mantelolaun Sergio Asis Lopes, agradese ba espoza Xefe-Estadu tanba bele vizita ona povu afetadu inundasaun hodi apoiu aihan bázika, maske la too tuir sasan sira ne’ebé dezastre naturais estraga, importante hakmaan netik sira nia nesesidade ba loron hirak mai.

Komunidade suku Wenunuk no Mantelolaun, hamutuk uma kain 67 mak afetadu maka’as ba dezastre naturais.

“Ita la haree ba kuantidade maibé, grasa maromak inan-nasaun bele sama iha rai Bikia-Metinaro hadi hare rasik ita-nia kondisaun,” Reprezenta Xefe Suku hato’o.

Komunidade afetadu ho tristi hatoo sira nia preukupasaun ba dezastre ne’ebé estraga ona sira nia uma no sasan uma laran.

Tanba ne’e, komunidade afetadu husu ba governu atu tau bronko para satan netik mota, arranca bee-mos no eletrisidade.

Xefe Suku Sabuli, Jose Maria da Costa Oliveira, agradese ba apoiu husi Prezidensia Republika, tanba apoiu ona aihan bázika.

Espoza Presidente Repúblika Cidália Nobre L. M. Guterres, hato’o komprimentus no solidariedade Chefe Estadu ba povu iha Metinaro tanba afeta ona husi Dezastre Naturais, ne’ebé kuaze iha teritoriu Timor-Leste hetan inundasaun.

“Inundasaun ida ne’e, inundasaun ida boot tebes tanba akontese kuaze fatin barak. Liuliu iha Dili sai sabraut kedas, mota lori uma, rai taka uma no hamate mos ita-nia maluk timoroan balu,” Espoza PR, dehan.

Ba autoridade lokál agora servisu maka’as foti dadus komunidade afetadu hodi hatoo ba governu sentral bele. Alende ne’e espoza sei hato’o preukupasaun hirak ne’e ba Prezidente Repúblika Francisco Guterres Lú Olo hodi trata ho Primeiru Ministru Taur Matan Ruak.

“Ha’u sei hato’o ba ita-nia Prezidente para trata ho Primeiru Ministru, hanesan na’i ulun lakohi atu povu balu mak senti diak, balu iha oin no balu iha kotuk fali, ita hakarak preukupasaun sira ne’e tama lalais para governu responde-jerál.” Espoza PR, hatete.

Inan nasaun ne’e husu ba komunidade ne’ebé hela iha mota-ibun atu atensaun nafatin iha tempu udan.

Apoiu ne’ebé mak Prezidénsia Repúblika apoiu hanesan: fos, supermie, sabaun, mina, masin no nesesidade seluk.