"Ita komesa fahe ona fós sira ne'e ba iha akontesimentu sira ne'ebé mak iha Costa sul foin dadaun ne'e, iha munisipiu Vikeke, Lautem, Manatutu, Kovalima no munisipiu seluk, ida ne'e, ita fahe ona fós sira ne'ebá no mós nesesidade báziika sira seluk,”dehan SEPS, Joaquim dos Reis Gusmão, iha Tibar, kuarta horseik (13/07).
Nia hatutan, dadus temporaria ba familia afeitadu, ne'ebé tama iha SEPS hamutuk rihun 1.535, husi númeru ne’e komesa, sura husi Munisipiu Vikeke, Lautem, Baukau, Manatuto iha area Natarbora nian, Iha Manufahi parte Alas nian no mós Kovalima iha Postu Administrativu Suai.
"Até agora ita fó apoiu hotu ona, ita mós sei iha tan lista reklamasaun balun ne'ebé seidauk hetan apoiu, ita sei hein nafatin para ita bele fó apoiu,”tenik nia.
Nia dehan, bainhira kompleta ona dadus hirak ne’e, SEPS sei kolabora ho Sentru Nasional Lojistik (CLN), hod haree ba armazen sira iha munisipiu, atu bele stor fós ka sasan hodi bele fó apoiu ba vitima sira.
"Sim, CLN halo ona servisu no parte protesaun sivil halo servisu hodi asegura katak iha munisipiu sira iha stok para atu fo apoiu emerjensia, apoiu emerjensia sira ne'e hanesan hahan, fos no mós nesesidade bázika sira seluk, ba vitima afetadu sira," nia relata.
Ho nune'e nia akresenta, parte protesaun sivil normalmente antes akontese dezastre naturais ruma, iha stok ba munisipiu sira. Bainhira stok sira iha munisipiu menus ona, SEPS hetan relatoriu husi munisipiu sira, hafoin aumenta tan stok balun.
Nia akresenta, agora dadauk sasan sira sufisiente, atu bele apoiu ba komunidade sira ne'ebé afetadu.
“Hanesan uluk akontese inundasaun 4 abril liu ba, ita sente difisil uituan tanba ita nia sasan ladun sufiente ne'e mak ita husu tan tulun husi ita nia parseiru sira, maibe akontese inundasaun foin lalais ne'e, ita sei bele maneza ita nia stok, sei bele fó apoiu, ho ita nia parseiru agora dadauk iha munisipiu sira,"hakotu nia.
