Kestaun ne'e Prezidente Repúblika, José Ramos Horta hato'o bainhira partisipa iha seremonia despedida traballadór Timoroan na’in 111 ne’ebé atu ba servisu iha Korea Súl.

"Apoiu 100% ita nia Joven sira ba rai li'ur, mais tenke ba organizadu liu husi SEFOPE, ou ajensia ne'ebé mak iha kooperasaun ho SEFOPE, la bele fiar ema balun ne'ebé mak promete tuun sa'e," dehan nia liu husi diskursu, iha Salaun Ótel Timor Lodge, sesta ne’e (15/07).

Xefe Estadu ne’e hatutan, labele fiar ajensia ne’ebé laiha kuiñesimentu husi Governu ou ema balun ne’ebé koko atu bosok joven sira atu ba servisu iha estrangeiru.  

Prezidente Repúblika ne’e dehan, hanesan foin dadauk, joven balun atu ba servisu iha Alemaña no Abudabi, maibé to’o iha ne’ebá la iha servisu ruma sira atu halo tanba laiha kuiñesimentu husi Governu entre nasaun rua ne’e.

"Portantu labele monu ba ema ne'ebé mak bosok imi ne'e, fó de'it dolar amerikanu rihun $5, labele fiar ida ne'e, sei imi duvida karik, ba ko'alia iha  SEFOPE,” nia informa.

Iha fatin hanesan, Sekretariu Estadu Formasaun Profesional no Empregu, Alarico do Rosário hatete, SEFOPE sei haruka tan traballadór na’in 111 ba servisu iha Korea Súl, ne’ebé kompostu husi mane na’in 110 no feto na’in 1.

Husi númeru traballadór hirak ne’e, na’in 88 sei ba servisu iha area peskas no na’in 23 ba servisu iha area fabrika no industria.

“Ohin ita halo despedida ba alin sira atu ba servisu iha Korea do Súl, tanba ne’e, ohin ami konvida Prezidente Repúblika, José Ramos Horta hodi hato'o mensajem ba ita nia traballadór sira ne’ebé atu ba servisu iha rai liur,”dehan nia.

Governante ne’e dehan, Prezidente Repúblika mak hanesan matadalan ida ba joven traballadór sira.

“Ita konvida Prezidente Repúblika, mai partisipa tanba ita hatene katak, ho esforsu ninian hodi buka dalan ho diplomata sira iha rai liur to’o Korea do Súl, ne’ebé pronto simu ita nia traballadór sira no matadalan ne'ebé haruka ita nia traballdór sira ba servisu Korea do Súl mai husi Prezidente Repúblika José Ramos Horta,”tenik nia.

Tanba ne’e, SEFOPE husu ba traballadór sira atu ba servisu iha Korea Súl, atu kumpri lei no labele halai ses husi sistema.

Entretantu, Markulina de Jesus, senti kontente tanba hanesan feto Timoroan ida bele hetan oportunidade ba servisu iha Korea Súl.

“Ha’u senti kontenti tebes, tanba ha’u bele hetan oportunidade ba servisu iha rai liur, la'os atu hetan osan atu riku liu, maibé hetan osan uituan atu ha'u bele muda ha'u nia moris, diferensia uituan ho sira seluk,”dehan nia.

Nia dehan, iha parte ida, nia senti triste tanba husik hela familia sira, maibé nia sei la lakon vontade atu hakat hodi esforsu ba moris diak.

Enkuantu, traballadór hirak ne’e sei aranka ba Korea Súl, iha loron 18 fulan-Jullu tinan ne’e.