Tuir SEFOPE, Alarico do Rosário, hatete, prosesu atu haruka joven traballadór sira ba servisu estranjeiru, laos buat fasil no tenki buka hatene uluk kriteriu sira iha nasaun refere.
Nia dehan, atu haruka ema ba servisu iha rai liur mak Governu Timor-Leste, tenki tur hamutuk hodi halo akordu ruma, bainhira iha akordu mak Governu haruka ema bá, maibé tenki fó kuiñesimentu ruma ba embaixadór sira iha rai ne’ebé Timoroan sira atu servisu bá.
Nune’e mós tenki iha linã komunikasaun ne’ebé diak no iha baze legal ruma.
"Ha'u hakarak atu hateten katak, SEFOPE iha planu atu halo komunikasaun ho nasaun ne'ebé de'it, inklui Governu Portugal, iha ona komunikasaun via telefone husi Embaixadóra Portugal iha Timor-Leste atu hasoru malu, atu koalia oinsa? kona ba preparasaun ba joven sira servisu iha Portugal,”dehan nia iha Ótel Timor Lodge, sesta horseik (15/07).
Nia hatutan, SEFOPE seidauk iha kuiñesimentu kona ba joven sira ne’ebé ba servisu iha Portugal, tanba ajensia ne’ebé fasilita joven sira, laiha rekoñesimentu husi Governu.
"Dalan baze legal atu ba rai liur mak parte SEFOPE no Ministeriu Negosiu Estranjeiru no Kooperasaun (MNEC), tanba parte MNEC mak ba halo akordu no nasaun sira, parte Sekretáriu Estadu Formasaun Profisional no Empregu hein implementa," hakotu nia.
Entretantu, Prezidente Repúblika (PR), José Ramos Horta, husu ba joven sira bainhira atu ba servisu iha rai-liur tenki liu husi Sekretaria Estadu Formasaun Profesional no Empregu (SEFOPE), no iha kuiñesimentu husi Governu, atu nune’e labele hamosu problema iha estranjeiru.
"Apoiu 100% ita nia Joven sira ba rai li'ur, mais tenke ba organizadu liu husi SEFOPE, ou ajensia ne'ebé mak iha kooperasaun ho SEFOPE, la bele fiar ema balun ne'ebé mak promete tuun sa'e," dehan nia.
