"Ami nia misaun ida mak atu fó asisténsia legal ba feto sira no labarik feto hodi asesu ba justisa formal, aleinde ida ne'e, ami mós fornese edukasaun legal liu husi treinamentu ba ami nia tarjeitu sira," dehan Jestor Programa Alfela, Olinda Cardoso, iha Salaun Delta Nova, sesta foin lalais (15/07).

Nia hatutan, parte ALFeLa mós halo advokasia hamutuk ho parseiru sira hanesan, JMSP no FOKUPERS hodi luta ba direitu feto nian.

Aleinde, ALFeLa mós servisu hamutuk ho PRADET no Uma Mahon sira hodi fó asistensia ba vitima sira.

"Ami fornese asisténsia legal komesa husi inisiu sira, vitima hato'o keisa ba polisia no depois hakat ba ministeriu publiku no to'o ba prosesu julgamentu iha tribunal," nia fundamenta.

Enkuantu, Jestor ALFeLa ne’e akresenta, dadus husi inisiu estabelese oganizasaun refere iha tinan 2006 to’o agora, ALFeLa rejista ona vitima hamutuk rihun 5.596.

Husi númeru ne’e, fó ona asistensia legal ba feto no labarik hamutuk 51%, no kazu remata ona Tribunal.

Entretantu, kazu ne’ebé dadauk ne’e sei ativu no sei presiza akompañamentu husi ALFeLa, PRADET, FOKUPERS no organizasaun sosiedade sivil sira seluk, hamutuk 2.563 kazu.

“Kazu ida ne'e, maioria mak kazu violensia domestika, entaun kazu violensia domestika hamutuk sei ativu iha ALFeLa mak 1.329 kazu, ne'e la'os violensia fiziku de'it, la'os violensia abtratu, maibe ida ne'e inkaixa mos kazu violasaun sexual, abuxu sexsual no kazu insestu", nia hato'o.

Tanba ne’e, organizasaun sosiedade sivil nafatin hala’o nia papel hodi fó asistensia no asegura vitima sira.