Tuir Diretor Jerál MSSI, Florencio Pina Dias Gonzaga, hateten, parte sosial kontinua estabelese parseira diak ho FOKUPERS, hodi tau matan ba vitima violensia domestika ne’ebé dadauk ne’e hela iha Uma Mahon sira.

Nia dehan, FOKUPERS nu'udar tipu utilidade sosial ida ne'ebé MSSI rekoñese no aprova ona sira nia utilidade sosial, no husu sira atu ba oin kontinua nafatin tau matan ba vitima sira iha Uma Mahon.

"Ha'u la espesifika ba uma mahon ninian, maibé ba uma mahon 9 ne'ebé ita hahú aloka orsamentu husi tinan 2018 mai to'o agora ho totál orsamentu kuaze hamutuk millaun rua ital, ne'e ba uma mahon ne'ebe ezisti iha Timor-Leste,"dehan nia ba Jornalista sira, hafoin partisipa loron aniversariu FOKUPERS nian ba dala-25 iha Delta Nova, sesta foin lalais (15/07).

Nia hatutan, kada tinan MSSI aloka orsamentu ba iha Uma Mahon sira lahanesan, no depende ba sira nia programa no dadus husi total vitima ne'ebé sira atende kada tinan.

Ho nune’e, Uma Mahon ne’ebé eziste iha Timor-Leste mak hanesan, Uma Mahon Maria Tapo iha Munisipiu Bobonaro, Uma Mahon FOKUPERS, Caza Vida, PRADET, ALFeLa, iha Munisipiu Dili, Uma Mahon Salele, Uma Mahon Forum Peduli Wanita iha Oe-Cusse, Uma Mahon Paz iha Baukau no Uma Mahon Rogerio iha Lospalos.

Entretantu, Diretóra FOKUPERS, Maria Fatima P. Guterres, hatete, kazu violensia domestika kontinua akontese tanba ho kestaun sosial no ekonomia.

Enkuantu, tuir dadus hahú husi tinan 2020, FOKUPERS rejista kazu violensia domestika hamutuk 200, aleinde, iha tinan 2021 rejista kazu hamutuk 300.

Nune’e, iha tinan 2022, hahú husi janeiru to’o mai iha fulan jullu, rejista kazu hamutuk 70.

Husi númeru kazu ne’ebé rejista laos deit, kazu violensia domestika, maibé iha mós kazu violensia bazeia ba jeneru, kazu abuzu seksual, kazu insestu, abandona no agravasaun fiziku.

Diretóra ne’e akresenta, hahú inisiu to’o agora vitima sira ne'ebé tama iha Uma Mahon FOKUPERS hamutuk rihun 4, husi númeru ne’e vitima ne’ebé hakarak hetan asistensia direita husi FOKUPERS.