Xefe Sentru Saúde Osso-Queli Flaviano Piedade Verdial hatete, ai-moruk item 10 ne’e hotu hahú kedas iha fulan-Maiu nia laran.

Tuir nia, ai-moruk item sanolu ne'ebé stock out mak hanesan, Vitamina B1 ho B6, Ibuprofen, Tetrametason, Panadol, zin, oksigen tablet, extrametazon, gransol no Tetrasolin (matan nian).

"Bainhira pasiente sira mai mak presiza ai-moruk ne'e la iha, ami taka fali ho antibiotik seluk maibé ba ida ne'ebé mak la iha duni ami fó hatene sira, karik sira ba hola fali ne'e konforme sira," dehan Xefe ba Jornalista INDEPENDENTE liu husi Via Telefone, Kuarta (12/07).

Ho situasaun ida ne'e, sira mós hato'o ona ba farmasia iha munisipiu hodi bele fasilita hela ai-moruk ba sentru saúde, atu nune'e sira bele atende ba pasiente nia nesesidade maibé seidauk iha resposta.

Aleinde, nia dehan, Sentru Saúde refere seidauk iha fatin maternidade ba inan isin-rua sira atu uza, tanba durante ne'e sira uza de'it fatin observasaun.

"Iha ne'e ami persiza tebes kria maternidade, tanba maternidade la iha ne'ebé durante ne'e uza de'it fatin observasaun hodi atende inan isin-rua sira," dehan Xefe.

Enkuantu, Sentru Saúde refere hahú fulan-Janeiru to'o Juñu rejistu kazu Intesaun Respiratoriu Aguda (IRA) hamutuk 270 no inan-isin rua ne'ebé halo konsulta hamutuk 62.

Iha sorin seluk, Ministra Saúde Elía Amaral hatete, ai-moruk ne'ebé dadaun ne'e iha Servisu Autonomo Medikamentu Saúde (SAMES) stock out iha item 300 ka 78% mak disponivel hela iha SAMES.

"Total ai-moruk ne’ebé eziste iha armajen laran hamutuk item 465 no stock disponivel hamutuk 300 item. Total stock out iha departamentu 10 iha SAMES hamutuk 688 ho % 32," dehan Ministra iha Palasaiu Governu.

Nia dehan, ai-moruk refere sei auguenta to'o fulan rua ka tolu ba oin no sei responde ba situasaun ne'ebé dadaun ne'e Sentru saúde sira enfrenta.